Min thlang tling a nih chuan Aizawl leh Mamit-ah Bru House kan sa ang :Lalrinliana Sailo

#ZabilianZ Oct 21: Tunhnaia Assembly Speaker atanga banga BJP zawm ta Lalrinliana Sailo-in MLA inthlan lo awm turah thlan tlin a nih chuan "Aizawl leh Mamit-ah Bru House kan sa anga, Eklavya School kan hawng bawk ang, hemi atan hian Central Minister pawhin min thlawp thlap a ni" a ti.

Mamit biala BJP candidate Lalrinliana Sailo chuan vawiin khan Mamit bial chhunga awm Nalzawl khuaa vantlang inkhawmah he thu hi a sawi a. An thusawi te nemnghet turin tun thla ni 30-ah Prime Minister Narendra Modi-a'n Mamit tlawh dawn niin a sawi.

Lalrinliana Sailo chuan Nalzawl khaw kawng chhe lutuk mak a tih thu sawiin, a rinphak baka chhia a nih tuh a sawi a. "Min thlang tling a nih chuan in khaw kawng hi thla 6 chhungin ka tender nghal ang" tiin, "Hetiang khawpa sorkarin a lo hnuchhawn che u hi a mak ka ti hle a ni, bial ka lo enkawl tawhah chuan an khaw kawng ka blacktop vek" a ti.

Hmasâwnna hrang hrang awm thei ten mirethei te a thlen phâk theihna turin hma a la dawn nia sawiin, Lalrinliana Sailo chuan "min thlang tling a nih chuan hmuh theihin hma in sawn ang, hetiang thu hi ka la sawi ngai lo, Central Minister-ten in hnenah hrilh turin min ti a ni" a ti a. "Mizoram sum dinhmun chhe tak atanga chhanchhuak turin BJP hi kan mamawh" tiin, "tun anga kan kal zel a nih chuan kan ram hi a rethei hle tawh dawn a, mipui sorkar dik tak kan neih theih nan BJP hi kan mamawh a ni" a ti.

Kum 50 chhung Congress-in India ram an hruai tawh a, India ram chu khutah an dah nia sawiin, Lalrinliana Sailo chuan Narendra Modi kaihhruai BJP sorkarna hnuaiah erawh khawvel economy lian top 10-ah langin pa 5-na ah a hlangkai tawh niin a sawi bawk.

Nagaland Deputy CM Y Patton pawhin thusawiin, Lalrinliana Sailo chu Narendra Modi pawhin a rin ngam a nih thu sawiin, Mamit bialin an thlang tling a nih chuan an tan malsawmna a ni dawn niin a sawi a. Sorkar siamtu lamah an tel ngei dawn nia sawiin, Lalrinliana Sailo chu an thlang tling a nih Dy. CM dinhmun luah theih tur niin a sawi.

BJP chu Kristian te dodaltu anga puh thin an nih thu sawiin, Y Patton chuan "hei hi thu diklo a ni" a ti a. Amah ngei pawh Kristian pa a nih thu sawiin, sakhuana lamah harsatna a la tawk ngai lo niin a sawi bawk.