C. Ṭhuamluaia Mual, Lungleia flood light dahna tur Rs. vbc 5 ruahman a ni :Chief Minister

#ZabilianZ June 26, 2026: Chief Minister Lalduhoma'n C. Ṭhuamluaia Mual, Lungleiah zan lama inkhelh theih turin flood light dahna tur sum Rs. vbc 5 SASCI 2026–2027 priority project-ah dah fel a nih tawh thu a sawi.

HPC Cup 2026 hmawrbawkna a hmanpuinaah he thu hi Chief Minister, Lunglei High Powered Committee (HPC) Chairman ni bawk Lalduhoma chuan vawiin khan a sawi a. Thuamluaia Muala inthiarna leh dressing room te pawh HPC district annual fund aṭanga cheiṭhat tura ruahman fel a nih tawh thu a sawi bawk.#zabilianznews

Lunglei Municipal Council (LMC) hnuaia Lunglei hmasawnna tur project pawm tawh engemawzat zingah – Rs. vbc 4 senga Sazaikawa LMC Complex sak tur te, Rs. vbc 5 senga Saikuti Hall cheiṭhat tur te, Rs. vbc 3.5 senga Theiriata Transport Hub sak tur te leh Rs. vbc 2 senga Ramthar AOC-a Market shed sak tur te a tel thu pawh Chief Mnister chuan a sawi a. ATL road Haulawng - AOC Ramthar inkar km 34.78-a thui siam hna SLT Infracon Pvt. Ltd Company-in an thawh mek thu leh a bak zawng km 29.22 chu sanction leh hmabak a nih thu te, March 2027 ah zo hman tura tih a nih thu te a sawi

Chief Minister chuan kar hmasa khan SASCI 2026–2027 Part-I aṭanga hnathawh tur te thlan fel a nih thu sawiin, chhim lam hmasawnna tur hna hrang hrang – Lunglei AOC (Ramthar Veng) aṭanga Lunglawn Three Gate inkar kawng siamṭhatna tur Rs. nuai 377, Lunglei Venghluna Multipurpose Building sakna tur Rs. nuai 571 bakah chhim lam hmasawnna tur dang tam tak a tel thu a sawi.#zabilianznews

Chief Minister chuan Aizawl-Thenzawl-Lunglei (ATL) road chu national highway-a puansak tura sorkar laipui-ah a dil ṭhin thu leh national highway awm tawh sa a awm avangin parallel-a national highway kaltir chu an kalphung a nih loh thua an lo hnar thu pawh a sawi a. Aizawl - Thenzawl chin tal puansak tura a dilna erawh chu remtihsak a nih thu leh NHIDCL-in DPR siamtu tur zawnna tender an tihchhuah mek thu leh tender chu tun thla tawpah hawn a nih tur thu a sawi.

SASCI project hnuaia Rs. vbc 55 senga Lunglei tuilakna tihchangtlun hna thawh mek chu zaa 80 zawh a nih tawh thu leh Febuary 2027-a zawh hman tum a nih thu Chief Minister chuan a sawi a. AMRUT 2.0 project hnuaia Rs. nuai 997.78 senga GLWSS tihchangtlun hna thawh mek pawh zaa 99.95 zawh a nih tawh thu a sawi bawk.#zabilianznews

Urban Infrastructure Development Fund 2025–2026 aṭangin Lunglei tan Rs. nuai 525 dah a nih thu sawiin, Lunglei Park chu Rs. vbc 2 senga cheiṭhat tur a nih thu a sawi a. Lunglei khawpui chhungah vantlang inthiarna pali - Rs. nuai 25 ṭheuh senga siam tura peihfel a nih tawh thu leh Lunglei khawpui chhung hmun hrang hranga kea kalna footpath siamna tur Rs. nuai 225 ruahman a nih tawh thu te a sawi.

Pukpuia Mizoram Engineering College (MEC) panna kawng siamna atan Rs. nuai 1012, tui pekna leh dahkhawlna siamna atan atan Rs. nuai 249.44, eng pekna leh transformer bunna atan Rs. nuai 106.36 leh campus tihchangtlunna, hmanrua leh bungraw hrang hrang leina atan Rs. nuai 1435.39 dah a nih thu Chief Minister chuan a sawi bawk.#zabilianz #zabilianznews #zofatehuapzo