#ZabilianZ June 19, 2026: Mizoram Pro-Active Governance and Timely Implementation (Mi-PRAGATI) thutkhawm vawithumna chu nimin khan CM Conference Hall-ah Chief Minister Lalduhoma hova neih a ni a. Mi-PRAGATI chu sorkar hnathawhte langtlang leh rang zawka kalpui zel dan ngaihtuahtu committee, thu nei tak a nih thu Chief Minister chuan a sawi.
Chief Minister chuan Mi-PRAGATI chu state chhunga hmasawnna hnathawh lian zual te vila, harsatna te chinfel dan dappuitu leh a tul anga department hrang hrang thawhhona tichak tura din a nih thu a sawi a. An thutkhawm vawithumnaah hian NABARD RIDF (Rural Infrastructure Development Fund hmanga Mizoram sorkar hnathawh mek, project amount Rs. vbc 3 aia tam chin project 53 te an thlirhova, hna kal muang zual te kal muan chhan leh chak zawka hnathawh dan tur te an sawiho bawk.
Railways lamin Rs. vbc sing 4, sang 4 leh 800 vel senga thawh tur Sairang - Hmawngbuchhuah rel kawng ruahmanna an sawifiah a. He rel kawng hi kilometer 224 vela thui, station 20 awm tura duan a nih thu an sawi.#zabilianznews
Thenzawl Rel Station awmna tura riruat tawh chu Thenzawl khua atanga a hlat deuh avangin Chief Minister-in hnai deuh zawka dah dan zawng tura Railways lam a lo hrilh tawh bawhzui dan te an sawi bawk.
Ropuiliani Tribal Freedom Fighter Museum leh State Tribal Institute sak mek te, PM SHRI hmalakna kal mek te, Swachh Bharat hmalakna te, Kaladan Multi Modal Transit Transport Project hmalakna te, PWD hnuaia hnathawh lian zual leh hnathawh timuang thei harsatna an tawh leh project kalpui lai enzui ngai bikte an sawiho a. Harsatnate chinfel dan tur an sawiho bawk a ni.#zabilianz #zabilianznews #zofatehuapzo
0 Comments