Mipui sum chu mi tlem te kutah awmin, mi tlem te-in an chawm a, an hawp bawk :MPCC Sr. Vice President

#ZabilianZ June 20, 2026: MPCC Senior Vice President Lalnunmawia Chuaungo-in Mizoram hmun tinah sum harsatna a thleng nasa nia sawiin, "mipui sum chu mi tlem te kutah awmin, mi tlem te-in an chawm a, an hawp bawk" a ti.

Chawngtlai, Tualte, Chalrang, Khawhai, Sialhawk, Biate, East Lungdar, Mualcheng leh Khawlailung khua te tlawha an party mi leh Lakhuihthei, Sapthei leh Tomato chingtute nen an inkawmnaah he thu hi MPCC Sr. Vice President chuan a sawi a. Sum harsatna chuan rukrûk, tualthah, inrawk, ruang chhar, ruihhlo tawlh te nasa takin a ti hluar niin a sawi.#zabilianznews

MPCC Sr. Vice President chuan "ZPM Chief Minister chu portfolio nei ve lo tura inzuar a ni mahse, tunah chuan dan humhima, dan anga kal duh Pu K. Sapdanga department chan DP&AR chu mi tute emaw tana kawng sialsak duhna avangin Chief Minister chanpual atan chhuhsak a ni" a ti a. Hei hian mipui sorkar, ram rorelna tha he sorkara beisei chi a nih loh zia a tichiang niin a sawi bawk.

Doctor indaihlohna sutkian chhoh mek a nih thu pawh MPCC Sr. Vice President chuan sawiin, "Congress party-in Mizoram ngei ah doctor zirna a lo buatsaih vang a ni" a ti a. "Hei aia changtlung hian Congress chuan kan thuam tha leh zual dawn" tiin, zirna school te pawh India rama zirna tha tia hriat hlawh tur khawpa siam tura ruahmanna an siam thu a sawi.#zabilianznews

Congress party-in mitin fairel thleng phak sorkar a siam tur thu sawiin, NLUP changtlung zawk kalpui turin ruahmanna an siam mek niin MPCC Sr. Vice President chuan a sawi a. Kuthnathawktute tan dawhkan atanga ruahmanna siam mai lova a hmunah ngei tlawhchhuak an nih thu a sawi bawk.

MPCC Sr. Vice President chuan BJP party pawh an buai hle nia sawiin, "India thalai maktaduai telin BJP sorkar thlak duhin nitin state hrang hrangah lungawi lohna an lantir a, central-ah Congress tan kawl a eng" a ti bawk a ni.#zabilianz #zabilianznews #zofatehuapzo