Neihloh khaw sawnna tur master plan pawm - chhungtinin nuai 15 dawng dawn

#ZabilianZ May 06, 2026: Neihloh village planning committee chu Chief Minister Lalduhoma hovin vawiin khan thukhawmin, Neihloh khaw thar tur master plan an thlirhova, siamthat ngai te siamthain an pawm.

Kum 1898-a din Neihloh khua hi a khaw puma leilung chetna hmun, khuarel chhiatna laka him tawk tawh lova ngaih a nih avangin an khaw ram chhung hmundanga sawn tura ruahman a ni a. Engemawchen hmalak tawh niin, khaw hmun thar tur an vat fai tawh a, khaw chhung inkalpawhna kawng laih tan a nih tawh bakah department hrang hrangin hma an la tawh bawk.

Sorkar-in a ruahman danin Neihloh khuaa chhungtinte chu khaw thara an in sakna tur Rs. nuai 15 theuh pek an ni dawn a. Sum hman belh tur nei te chuan lian zawk leh tha zawkin in an sa thei bawk ang. Neihloh khuah hian chhungkaw 77 awmin, mi 400 chuang hret an cheng a ni.

Sorkar report-a a lan danin, survey vawi nga neih a nih hnuah master plan siam a ni a. Neihloh khaw thar tur hi hectare 60 biala zau tura duan, plot 105 nei, plot tin square meter 800 aia zau vek an ni. "Plot pakhat chhungah in pakhat bak sak phal loh ni se, in hi sak belh dawn chuan plot tharah zel dah ni se an ti a. A khua hi tihzauh zel theih tura duan a ni" tia tarlan a ni a. Master plan-ah hian vantlang hmunhma pawimawh - community hall, school, VC house, biak in, tanky leh ruahtui khawlna hmun tur te, solid waste management centre te, transformer dahna tur te, parking area leh green area tur te duan vek a ni a. In sak dan tur ruahmanna (minimum standard) a keng tel bawk.

Vawiina Chief Minister hova thukhawm chuan nodal agency ruatin, state level-ah Planning & Programme Implementation Department leh District level-ah Serchhip DC an ruat a ni.#zabilianz #zabilianznews #zofatehuapzo