POL leh LPG stock lamah Khawzawl district-in harsatna kan la tawk rih lo :Addl. DC

#ZabilianZ May 06, 2026: Khawzawl District Addl. DC K. Zorammuana'n Khawzawl district-a POL leh LPG dinhmun chungchangah vawiin khan thuthar thehdarhtute kawmin, Khawzawl district-in POL leh LPG stock lamah harsatna a la neih rih loh thu a hrilh.

Khawzawl Addl. DC chuan khawvel ram thenkhat inkara indona-in India ramah tuialhthei (POL) leh eirawngbawlna gas (LPG) indaihlohna a thlen thu sawiin, Khawzawl district erawh chuan POL leh LPG stock lamah harsatna a la tawk rih lo niin a sawi a. LPG distributor-te chu an bial chhung consumer-te hnenah bak pechhuak lo turin thuchhuah a lo siam tawh tih a sawi.

Filling station-te pawh POL harsatna a awm hmaa load la zung zung tur leh motor tanky khat bak uchuak taka bur-ah te pechhuak lo tura hriattir an nih thu Khawzawl Addl DC chuan a sawi a. Mipui ten POL leh LPG chungchanga harsatna an thlenna tur helpline centre din a nih tawh thu a sawi bawk.

Khawzawl DCSO Patrick Thiandinga'n a sawi danin, LPG commercial cylinder chu DCSO kaltlangin directorate-ah dil a ngai a, April thla khan bur 10 pek chhuah a ni a, tun thla ah bur 5 pek chhuah tawh niin, NGO, zirna in leh kohhran hman atana pekchhuah a ni.

Sawrkar laipui thuchhuahah thingtlang khuaahte LPG booking inkarah ni 45 a tlak a ngaih avangin supply a tikhaihlak deuh tih DCSO chuan a sawi bawk.

DCSO chuan Khawzawl district-ah LPG leh POL black-a hralh leh ramdanga thawnchhuah report a awm loh thu pawh sawiin, "hetiang thil a thlen loh nan a tul anga ven leh enfiah reng an ni" a ti a. "Petroleum Act, 1934 chuan mimal hman atan chauh license nei lo tan pawh tumkhatah petrol litre 30 chin lak emaw khawl a phal a, diesel litre 2500 chin bur khata litre 1000 aia tam lo khawl a phal" a ti bawk a ni.#zabilianz #zabilianznews #zofatehuapzo