Sports Minister-in sorkar laipuia Sports Secretary hmuin Mizorama sports hmasawnna tur hrang hrang a sawipui

#ZabilianZ May 06, 2026: Sports Minister Lalnghinglova Hmar-in nimin tlai khan Secretary, Ministry of Youth Affairs and Sports Hari Ranjan Rao chu Sports Authority of India Headquarters, New Delhi-ah kawmin, Mizorama sports hmasawnna tur, a bikin hockey chungchanga hmalak dan tur te a sawipui.

Sports Minister chuan, "Mizote game thiam chi ni si, tunhnaia kan khelh tam tawh loh hockey hi India tana international medal lak theihna kawng hnai a ni" tiin, "Thenzawla hmeichhe hockey zirna kan neih hi kan țhatpui em em a, hetiang model hian mipa tana hockey zirna siam kan duh a ni," tiin Hari Ranjan Rao chu a hrilh.

Empowering Mizoram sports hnuaia discipline pali - hockey, badminton, archery leh wrestling-ah te SAI Training Centre din belh theih dan ngaihtuah tul a tih thu pawh Sports Minister chuan thlenin, Director General of SAI ni bawk Hari Ranjan Rao chuan hockey tihhmasawn kawngah theihtawp chhuah a nih tur thu leh infrastructure awm sa hmang ṭangkaia a zirna changtlung zawk siam theih dan an lo zirchian tur thuin a chhang a. India sorkar pawhin hockey chu a ngaihpawimawh thu a sawi bawk.

Sports Secretary Hari Ranjan Rao chuan Mizoramin sports hmasawnna tur hmathlir (vision) fel tak neia hma a la chu tha a tih thu sawiin, tunhnaia sports lama Mizoram hmasawnna te pawh a lo hriat thu a sawi a. Football-a Mizote hlawhtlinna pawh sports dangah thil tih theih a nih a rin thu sawiin, Khelo India accredited training center ni tura Mizorama sports zirna kalpuina hrang hrang chu herrem ṭha a tih thu a sawi bawk a ni.#zabilianz #zabilianznews #zofatehuapzo