#ZabilianZ May 06, 2026: Chief Minister Lalduhoma'n Union Minister of Road Transport & Highways Nitin Gadkari chu Delhi-ah kawmin, Aizawl -Thenzawl kawngpui national highway-a puang tura a lo ngen tawh chungchang leh tul leh pawimawh te a sawipui.
Aizawl - Thenzawl kawngpui national highway-a puan chungchang-ah DPR siam mek a nih thu leh sanction thuai tum a nih thu Union Minister chuan Chief Minister chu a lo hrilh a. Mamit - Bairabi NH-06 Spur pawh thuamchak turin Chief Minister chuan ngenin, Union Minister chuan sanction nghal a nih tur thu a lo hrilh niin sorkar thuchhuah chuan a tarlan.
Vairengte - New Vervek NH-306A chhuat siamtha tura a ngenna pawh Nitin Gadkari chuan state PWD ruahmanna siamthat ngai thenkhat te siamthat a nih hnuah sanction a nih tur thu Chief Minister chu a lo hrilh a. NH-502 Zero - Siaha double lane-a siam tura ngenna chu Land acquisition man sang lutuk tihhniam dan lo zawng turin state sawrkar a lo ngenlet a, sanction thuai tura hma an lo lak tur thu a sawi bawk.
National Highway ni thin, double lane thar a kal tak avanga ngaihsak zui loh a awm thu leh state PWD a la hlan fel si loh kawngpui pawimawh paruk te one time improvement chungchang pawh Chief Minister chuan Union Minister chu a sawipui a. Nitin Gadkari chuan national highway road hlui an nih ngei chuan sanction a, resurface tur a nih thu Chief Minister hi a lo hrilh bawk
Mizorama kawngpui te an tlo zawk na tura kawngpui project thar te concrete road-a siamsak tura Chief Minister ngenna chungchangah Nitin Gadkari chuan cement factory lian nen inberema, cement man tlawm deuh zawka leia, concrete road siam theih a rinawm thu a sawi a. Ministry of Road Transport & Highways leh NHIDCL officer te pawh Bitumen man 40% laia a to chhoh tak avangin ngaihtuahna senga, hma la turin a hrilh nghal niin sorkar thuchhuah chuan a tarlang bawk a ni.#zabilianz #zabilianznews #zofatehuapzo
0 Comments