IPRP&S Minister-in AIR kum 90 tlin lawmna a hmanpui

#ZabilianZ May 06, 2026: All India Radio (AIR) kum 90 tlin lawmna kal zelah nimin khan All India Radio Aizawl-in Central YMA Hall, Tuikhuahtlang-ah musical concert an buatsaih a. IPRP&S Minister B. Lalchhanzova’n a telpui.

IPRP&S Minister chuan All India Radio kum 90 tlin lawmpuiin, "Mizo hnam zia leh ṭawng vawnhim kawngah ṭangkai takin hna an thawk a, Mizo hnam nun vawnghimtu pawimawh tak an ni", a ti. Khawvelah hnam ral tam tak an awm tawh tih sawiin, hnam ziarang leh tih dan hrang hrang vawnhim kawngah theihtawp chhuah a ṭul thu a sawi.

Mizo thu leh hla chawilar kawngah te, mahni hnam ngaisang tura inzirtir chungchangah te leh nun dan tha midang zirtir kawngah te All India Radio chuan an thawhhlawk hle tih IPRP&S Minister chuan a sawi bawk.

AIR Aizawl Director, Mizoram Cluster Head ni bawk DR Lalropuia'n All India Radio bulṭan dan sawiin, India ram zalên hma atang tawhin mipuite awi tleitu ber an lo ni tawh ṭhin tih a sawi a. Thuthar puanchhuahna ringawt ni lovin India hmasawnna tura thawktu sorkar leh mipuite thlunzawmtu tangkai tak an nih thu leh Viksit Bharat 2047 hmalaknaah pawh radio chuan mawhphurhna pawimawh tak a neih thu a sawi.

All India Radio hi June ni 8, 1936-ah din niin, New Delhi-ah Headquarters a awm a, AIR Aizawl hi India ram puma AIR station 230 zinga pakhat a ni a. AIR kum 90 tlin pual hian AIR Aizawl chuan May ni 8, 2026-ah Walkathon a buatsaih dawn a, a lawmna pui ber chu June ni 8, 2026-ah Vanapa Hall-ah Chief Minister Lalduhoma hova neih tum, a ni.#zabilianz #zabilianznews #zofatehuapzo