#ZabilianZ Sept 11, 2026: ZPM Adviser B. Lalchhanzova'n party dang chu an sorkar hunlaiin Zoram mipuiin fuih leh zilh ngamah an ngai mang lo nia sawiin, "ZPM hi chuan zilhtu, fuihtu leh tawngtaipuitu kan ngah em em mai a ni" a ti.
South Tuipui ZPM Joint Block Conference, Hnahthial Electric veng GSA hall-a a hmanpuinaah he thu hi vawiin khan B. Lalchhanzova chuan a sawi a. "ZPM danglamna em em chu CM, Minister leh MLA te hi party mipui ten hlemhletna laka fihlim turin chik takin min thlir a, CM, Minister leh MLA te pawhin ZPM mipui te chu hlemhletna kuitiaktu ni lo turin kan beisei a ni" a ti bawk.
ZPM sorkar hnu-ah thalai te rilru a tha zawngin a inher chho nia sawiin, "hna lak chungchangah party bil induhsakna ang chi a awm ta lova, hei hian thalai hna zawng mek te a tiphur a, Mizoram pawna awm thalai te pawhin Mizoram mi nih nuam an ti chho mek a ni" a ti.
Term hnihna sorkar din tura an inbuatsaih thu pawh sawiin, B. Lalchhanzova chuan "thil chik mi te chuan Zoram mipui rilru a dik zawnga kal mek hi an hmu thiam a, sorkarna pek leh tlak ni turin hma lam kan pan mek a ni" a ti bawk.zabilianz #zabilianznews #zofatehuapzo
0 Comments