#ZabilianZ Aug 24, 2026: Mualthuam North-a pawikhawihna thleng chungchangah pawikhawihtu nia rinhlelh ten pawikhawihtu an nih thu Police hmaa an puan hnuah pawikhawihtu nia insawi pahnih zinga pakhat zawk Denghmingthanga pa chu pawikhawihna tuartu te in-ah kalin thupha a chawi.
Denghmingthanga pa chuan an fapa thil tih avanga hrehawm an tih thu leh zahthlak an tih thu sawiin, pawikhawihtu chuan hremna hmu ngei se an duh thu a sawi a. Dindini chhung te hnenah thupha chawiin, thil tisual ve lo te ngaidam tura a ngenna chu Dindini pa Lalawmpuia pawhin pawmin, "thil tisualtute chu sorkar kutah an awm tawh a, sawi theih kan nei tawh lova, thil tisual ve lo an chhung te chu kan haw lova, Pathian hmingin kan ngaidam a ni" a ti.
Mizo mipui leh khawtlang hnenah pawh ngaihdam dilin, Denghmingthanga pa chuan Mualthuam North VC leh YMA ten an himna tur leh an tana tha tura ruahmanna fel tak an lo siam lawk avangin lawmthu a sawi bawk.#zabilianznews
Tarlan tawhin, kum 15 mi H. Lalramdinpuii, Mualthuam North thihnaa mawhphurtu nia rinhlelh mi pahnih - Denghmingthanga (20) leh Lalneihkima (34) ten he pawikhawihnaa mawhphurtu an nih thu Police hma-a an puan hnu ah pawikhawihtu chhung te ve ve in khawtlang leh ram mipui hnena thupha chawina leh ngaihdam dilna an tichhuak ve ve tawh a. Inrinni zan khan Lalneihkima nupui chu Dindini te in-ah kalin thupha a chawi tawh bawk.
H. Lalramdinpuii pa Lalawmpuia chuan pawikhawihtute chu sorkar kuta an awm tawh avanga tih theih an neih loh thu sawiin, an chhung te, pawikhawihtu ni ve lo te leh zel hrehawm taka an awm zui erawh tha an tih loh thu leh an chhungkua hmuh hreh phah nan te pawh hmang lo se an duh thu sawiin, an fanu chunga pawikhawihtu chhung te chu Pathian hminga an ngaihdam thu a sawi a ni.#zabilianz #zabilianznews #zofatehuapzo
0 Comments