#ZabilianZ July 2, 2026Mizoram Pradesh Congress Committee (MPCC)-in Mizoram sorkarin Mizotaxi application hman tura a ruahman chungchangah mimal induhsakna a awm nia an hriat thu an sawi a. An zirchian hnuaah Transport Minister leh application siamtute inkarah puanhnuai thil a awm ngeia an hriat thu sawiin, "mimal hlawkna tura taxi khalhtute leh auto-rickshaw khalhtute eizawnna tichhe thei application hi hmang lui lo turin Congress party chuan Mizoram sorkar a hriattir a ni" an ti.
Congress party chuan "he application hmanna turah hian state transport authority-in quatation leh tender chhuah lovin firm tharlam tak, sulhnu leh tawnhriat la neilo te inremna a ziahpui" tiin, hei hi dan bawhchhiatna a nih thu leh mipui pawisa eirukna kawng zau tak hawnna nia an hriat thu an sawi a. "He application hmangtute aṭanga chhiah (GST) lak telna tur a nih avangin Assembly House-a MLA te rel tur emaw Cabinet meeting-in a rel ngei tur a nih laia chutiang pawh awm lova state transport authority-in an thuneihna baka hma an la hi ram dan zahlohna leh mimal hlawkna tura uchuak taka induhsaknaah kan ngai a ni" an ti bawk.
Mizoram sorkar-in tunhnaiah taxi khalhtute leh auto rickshaw khalhtute chu Mizotaxi application zawm tura tiin, an zawm duh lo a nih chuan taxi permit pek belhah a vau ni pawhin MPCC chuan an sawi a. Sorkar thil tih dan chu hriatthiam har an tih thu sawiin, he Mizotaxi application chu ennawn leh turin sorkar an ngen bawk a ni.#zabilianz #zabilianznews #zofatehuapzo
0 Comments