#ZabilianZ Sept 14, 2026: Chief Minister Lalduhoma'n "Hindi thiam chu a tha a ni satliah lo, a tulin a tul tawh" tiin, Hindi thiam emaw thiam duh vang emawa an hnam zia entawn kher erawh a tul loh thu a sawi.
Mizoram Hindi Prachar Sabha bultuma Hindi Diwas Day, DMC, Pipu Tlang, Dawrpui-a a hmanpuinaah he thu hi vawiin khan Chief Minister chuan a sawi a. "Mizo takin Hindi tawng thiam ila, an hla i sa ang u. Chutianga kan tih loh chuan kan hnamzia kan hloh tial tial ang a, kan sakhua thlengin min hliau thei a ni. Mizote hian kan tawng leh kan culture-te hi tiral lovin kan tilian zel zawk tur a ni" a ti.
Chief Minister Lalduhoma chuan MP a nih laia a hmalakna zarah sorkar laipuiin Mizoramah Hindi pawl 10 leh PU (intermediate) exam phalna kum 1988-ah a pe nia sawiin, "a hnu lawk kum 2000-ah BA exam phalna a rawn pe bawk" a ti a. "Primary leh Middle School-a Hindi Teacher te chu Mizoram Hindi Prachar Sabha chherchhuah an ni deuh vek tawh, Mizoram Hindi College-a thawktute chu Mizo nula leh tlangval an ni deuh vek bawk a, Hindi Doctorate Degree nei pawh 20 chuang kan lo nei ta a. Kan hmathlirte kha a takin a rawn chang chho ta zel a ni" a ti bawk.#zabilianznews
School Education Minister Dr. Vanlalthlana pawhin Education Reforms Committee-in thla khatah ni khat tal Hindi Speaking Day hman a rel tih sawiin, "Hindi thiam hi hnamdangte nena kan inpawhna leh kan eizawnna atana thil tul a ni", a ti a. Mizoram Hindi Prachar Sabha-in Aizawl Traffic Police te Hindi spoken course a pe pawh lawmawm a tih thu sawiin, taxi driver te pawhin a tlanglawn chu thiam se tha hlea a rin thu a sawi.
Hindi Diwas Day-ah hian Hindi Subject-a Doctorate Degree nei thar te hnenah leh Traffic Police Spoken Hindi Course kalchhuak te hnenah chawimawina hlan a ni a. Zirlai naupang ten zai leh lamin hun an hmang bawk.#zabilianz #zabilianznews #zofatehuapzo
0 Comments