Mizo inneih leh rokhawm dan ennawntu committee-in Mizo inneih-ah nuta man siam ching chhunzawn lo turin Mizo mipui a ngen

#ZabilianZ Sept 3, 2026: Mizo inneih leh rokhawm dan ennawntu review committee-in Mizo inneiha nuta man siam chu tih ngai loh, tunhnua chin thar mai nia a lan thu sawiin, ching chhunzawn lo turin Mizo mipui an ngen.

Nu man pawh pasal nei tur hringtu nu - a fanu man dawngtu a nih loh emaw a fanu, pasal nei tur pa nen an awm hran chauhva a ei tur a nih thu committee chuan sawiin, "midangin nu man an ei thei lo", a ti.

Thian man chu mi nawlpuiin an kalpui mek dan te thlir chung leh Perry Sap Dan (A monograph on Lushai Customs & Ceremonies)-ah te, Mizo Hnam Dan 2006-ah te a lo lan tawh avangin huam zau zawka telh chhunzawm an rawt tur thu committee chuan an sawi bawk.#zabilianznews

Mizo inneih leh rokhawm dan ennawntu committee chuan kumina Mizoram assembly budget session-a Mizo inneihna leh rokhawmna dan siamthat ‘The Mizo Marriage & Inheritance of Property (Amendment) Act, 2026’ angin kohhran hrang hrang te chu inneihna certificate an pek chhuahah ‘divorce’ tih thumal chu ‘in accordance with the Mizo Marriage & Inheritance of Property Act, 2014’ tia thlak vek turin an chah.

Kohhran ten anmahni huang chhungah inneihna thiah leh inneih leh phalna pek dan an neih chungchangah he dan hi inrawlh lo mahse, he dan siamthat avang leh ram danin a phut angin "nupui pasal then tawhin midang neih leh an duh chuan inneihtir hmain court atangin an nupui pasal hmasa an then tih lantirna (divorce certificate) an nei ngei tur a ni" an ti a. Chutiang nei lova midang nei leh chu kum 7 emaw a thu azirin kum 10 thleng pawh lungin tan tira hrem theih an ni dawn tih sawiin, nupui/pasal dang neih tum leh inneihna buatsaihtute pawh fimkhur turin committee chuan a chah a. "Assembly-in Dan a siamthatah nupui/pasal nei leh tur ten divorce certificate an nei em tih hriat chu inneihtirtu mawhphurhnaa dah a ni" an ti.#zabilianznews

He thutkhawmah hian Mizoram Bar Association (MBA) President R. Lalremruata'n Supreme Court-in non-tribal fa hrin, tribal zinga khawsa, anmahni pawh inti hrang lo, khawtlangin an mi leh sa anga an pawm theih te tribal hamthatna pek theih dan a rel tawh leh Mizoram sorkarin a kalpui dan a sawifiah bawk.

Vawiina thutkhawmah hian sorkar aiawhin Law & Judicial Department leh DIPR mi leh sate bakah kohhran leh tlawmngai pawl aiawh: Council of Churches in Mizoram (CCM) aiwh, MHIP General Hqrs. leh MUP Hqrs. aiawh te bakah Women Commission Chairman leh Mizoram BAR Association President, MZU mithiamte leh helama tui mi sawm bik engemawzat an tel a ni.#zabilianz #zabilianznews #zofatehuapzo