Kan Candidate diklo taka puh hmingchhiat a ni, Criminal complaint file zui thuai kan tum :ZPM

#ZabilianZ April 11: ZPM party-in Lok Sabha inthlan lo awm tura an candidate Richard Vanlalhmangaiha chu "diklo taka puh hmingchhiat a ni" an ti a. A puh hmingchhetute thubuai siamsak an nih theih na turin hma an la dawn niin an sawi

Vawiin khan Aizawla an party pisa-ah ZPM Legal Department hruaitu ten thuthar thehdarhtute kawmin he thu hi an sawi a. ZPM Candidate Richard Vanlalhmangaiha chu eirukna thubuai chinfel vek tawh, a mawhphurtute pawh court-in a hrem tawhah inhnamhnawiha puh a nih thu sawiin, "Ni 10.04.2024 khan kum 2011 leh 2012 vela MAMCO Deputy Manager (Marketing) Lalremthanga leh MAMCO Consultant nia chhal Mustaqur Rahman, Guwahati te thubuai, contract hna inpek chungchanga inbumna thubuai chinfel tawh, hremna pawh pek tawh kaihhnawihah ZPM MP Candidate  sawiluh ve talh tumna David Sailo inti pakhat thuziah chu Social Media (Facebook leh Whatsapp) ah te nasa taka thehdarh a ni" an ti.

ZPM chuan "ni 10.04.2024 zanah vek Tuesday Nightmare Youtube channel chuan tu tute emaw phone-a be kualin, an inbiakna record chu thehdarh a nih bakah a rinthu tlem belhchhahin, case pawh la kal mek anga sawi zuiin a thehdarh leh bawk" an ti a. Hei hi politics-a dawt hmanga inbeihna tenawm tak niin an sawi.

"David Sailo inti leh Tuesday Nightmare youtuber ten an sawi Case hi ACB Case No. 06 of 2015 niin, S.R. (PCA) No. 04 of 2018 a ni a. He case-ah hian Lalremthanga, Lunglei, Chanmari leh Mustaqur Rahman, Guwahati lakah chauh thubuai siam a ni" ZPM chuan an ti a. "He Case hi chinfel vek tawh niin Lalremthanga hi ni 22.11.2022 khan thiamloh chantir a ni a, Mustaqur Rahman hi ni 6.2.2023-ah thiamloh chantir a ni tawh bawk a, case hi chinfel tawh niin, tihtawp a ni tawh" an ti bawk.

ZPM chuan "Social media ah leh Youtuber pakhatin he case-a Richard Vanlalhmangaiha (Richie-a) hmel tel hram an tumna chhan an sawi langsar berah chuan Affidavit-ah hming a sign ve tih a ni a. MAMCO lam intiamkamna lehkha kha kan chhiar a nih chuan MAMCO account-a sum lut ngei tur anga tarlan a ni a. Chumi avang chuan Assistant Manager a nihna angin Richard Vanlalhmangaiha khan a sign ve ngei tur pawh a ni" an ti a. "Amaherawhchu, sum luhna erawh MAMCO lam account-ah ni lovin, Lalremthanga leh Mustaqur Rahman account lamah a lo lut leh daih a ni tih ACB in an chhui chhuak leh vek a, pawisa vir vel dan zawng zawng chiang zawka kan hre duh a nih chuan Court Judgement & Order date 22-11-2022 leh 02-6-2023 ah te hian chiang takin tarlan a ni. Affidavit-a hming sign chungchangah hi chuan Richard Vanlalhmangaiha hi bum tel a ni ve zawk a ni" an ti.

"He thil kan sawiah hian Richard Vanlalhmangaiha  inhnamhnawih ve ngei ni se chuan a lakah thubuai siam lohna chhan tur engmah a awm lova. Ruling party thil tih theihna a nei ti dawn ila, case intan hunlaia ruling party chu Congress party an ni a, Thubuai ngaihtuah chhoh hun lai vel hi MNF party ruling lai niin, thuthlukna siam hun lai pawh MNF party rorel hunlai a ni" ZPM chuan an ti a. "He case-ah hian accused (thil tisuala puh te) te chu a chunga kan tarlan mi pahnih te chiah hi an ni a, Richard Vanlalhmangaiha chu Prosecution Witness (thuhretu) ah a tang zawk nghe nghe a ni" an ti.

"Tuesday Nighmare youtube channel-in phone call record a phochhuaha 'an mi bum tam tak zinga pakhat thusawi chu han ngaihthlak sak ta zuai ila' a tiha mipa pakhat thusawiah khan “Richie-a leh Pu Remthanga hi kan hlan thlap zel, an pahnih chiah zelin maw…” tikhan a sawi a. Tuesday Nightmare-i’n mi pakhat a tih hi Pu Tlanghmingthanga ni ngeiin kan hria a, a ni hi MNF ruhkawl niin, mi thenkhat phei chuan Pu Zoramthanga uite tihial in an sawi thin" an ti a. Pu Tlanghmingthanga hi Mission Vengthlanga mi inluaha khawsa thin niin, tunah chuan in hmun te leiin, a insak pawh a nep vak lo tih thu kan dawng leh zel bawk a. A mimal chungchang erawh chu sawi chhuak kher lo ila, engemaw chen chu kan hre ve a ni" ZPM chuan an ti.

ZPM chuan "Court Judgement & Order date 02.06.2023 a Para 7-a tarlan a nih dan chuan Kendriya Vidyalaya Lunglei emaw Champhai a School building sakna tur contract inpek intiamin, Rs. nuai 25 chu Pu Vanenga'n a ṭhianpa Pu Tlanghmingthanga, Mission Vengthlang nen Pu Lalremthanga hi ni 10.03.2012 khan an pe a. Contract hna hi an hmu lo a nih chuan thla tin 5% punga pawisa hi peklet an nih tur thu Pu Lalremthanga hian a sawi" an ti a. "Ni 23.05.2012-ah Pu Lalremthanga hian Rs. nuai 40 pe turin a ti leh a, Rs. nuai 40 hi an neih theih loh avangin Rs. nuai 20 chu Lalhmachhuana, Despatch Rider Bank account (Vijaya Bank) ah thun niin, Mustaqur Rahman Axis Bank Account-ah Rs. nuai 20 chu RTGS hmanga transfer leh nghal a ni" tiin, "Pu Tlanghmingthanga hian Pu Lalremthanga leh Pu Richard Vanlalhmangaiha te awmdun laia pawisa fai hlan fo thin anga a sawi hi Investigation Report leh Court Judgement atang hian dawt a sawi chiang hle a ni tih a hmuh theih a ni" an ti bawk.

ZPM Candidate Richard Vanlalhmangaiha chu he thubuaia tel ve lo nia sawiin, politics inbeihna tenawm tak hmanga tih hmingchhiat tumna leh mipui ten duhthlanna fim hmang theilo tura dawt hmanga inpuhna niin ZPM chuan an sawi a. Court zahawmna tihbawrhbannaah pawh an ngaih thu leh Court rorelna zahlohnaa an ngaih thu sawiin, Criminal complaint file zui thuai an tum thu an sawi bawk a ni.