#ZabilianZ April 23: Mizo Academy of Letters (MAL)-in vawiin khan Chanmari YMA Hall, Aizawl-ah an kum 60-na Diamond Jubilee lawmna hawnna hun hmangin, nikuma tih chhuah lehkhabu ṭha bera an thlan, 'Pangparhnima' tih ziaktu Ahmangaihi Khiangte hnenah 'Book of the Year 2023' chawimawhna an hlan.
MAL Diamond Jubilee lawmna leh Book of the Year lawmman hlan inkhawm hi MAL Presidentṭ Prof. RL Thanmawia'n a kaihruai a. He hun hmanpuitu MBSE Chairman JH Zoremthanga'n Book of the Year lawmman -chawimawina thuziak leh Rs. 10000 chu 'Book of the year 2023 - Pangparhnima' ziaktu Ahmangaihi Khiangte kutah a hlan a ni.
MAL-in a chhinchhiah danin nikum chhung khan lehkhabu 170 a chhuak a. Heng zingah hian Ahmangaihi Khiangte ziak 'Pangparhnima' tih chu Book of the Year 2023 atana thlan a ni. He lehkhabu hi thawnthu (fiction) niin, a thawnthu phuah dan leh a changtute a duan dan a danglam avang leh a ṭhat avanga Book of the Year atana thlan a nih thu Book of the Year thlangtu MAL chuan an sawi a. He lehkhabu hi phek 500 chuanga chhah a nih thu leh youtube lamah pawh ngaihthlak theiha a awm thu an sawi bawk.
MAL hi kum 1964-a din niin, kumin hi a kum 60 na a ni a, kumin kum tawp lamah a lawmna pui ber chu neih an tum thu MAL General Secretary Dr. Zoramdinthara'n a sawi a. Diamond Jubilee pual hian MBSE nena ṭangkawpin vawiin chawhnu lamah seminar an buatsaihin, MAL Asst. General Secretary Dr. H. Laldinmawia buatsaih 'Tunlai Mizo Thu leh Hla Thlirna' tih leh MAL Executive Committee member Dr. Laltleipuii buatsaih 'Mizo ṭawng kalhmang : Linguistic lam aṭanga thlirna' tih te an zirho a ni.
0 Comments