Congress thalaiin Zuangtui Kudam an tlawh, hlauthawnglo turin mipui an chah

#ZabilianZ Dec 20: Congress thalaiin ration buhfai sem tûr Zuangtuia sorkar kudam-ah a awm lo nia thuthar a awm avangin vawiin khan Zuangtuia sawrkar kudam chu an tlawh tih sawiin, mipuite hlauthawnglo turin an chah.

Congress thalai chuan retailer hrang hrangah December thla ration buhfai a ṭhena sema, a ṭhena sem loh a la nih chhan hre chiang tur leh kudam-ah retailer-te lak tur buhfai a awm loh thu an dawn avanga finfiah tura sawrkar kudam chu tlawh an nih thu an sawi a. Congress thalai President Pu Laltawnliana'n sawrkar tihmualpho tuma kal an ni lo nia sawiin, "mipuiin kan hnena an manganna an rawn thlen vanga Kudam hi tlawh kan ni" a ti.

Congress thalai President chuan retailer tinah Buhfai pek chhuah kim a nih thu a thawk ten an lo hrilh nia sawiin, mipuite thlaphang lo turin a chah a. "Opposition mah ni ila sawrkar hi mipui tâna an thawh that chuan kan lawm a, kan thlawp a ni" tiin, a hunah chuan sawrkar chu an diknaah chuan puih leh thlawp an inhuam reng thu a sawi a. Mipuiin an chanvo tur a hun taka an chan loha, mipui tawrhna a thleng dawn a nih erawh chuan huai taka mipui tan ke an pen zel tur thu a sawi.#zabilianz

"Retailer tam takin buhfai sem tur an nei har deuh leh a hun taka mipuiin an dawnglo pawh sawrkarin opposition beng a thlen kher hmaa hma la turin kan ngen" a ti a. "An inzawrh ang ngeia mipui tana tun aia nasa leh sawrkar kal tawh te aia thil titheia mipuia inzuar an ni tih inhre thar leh zual turin ka ngen duh a ni" Congress thalai President chuan a ti bawk.

Congress thalai President chuan "a hmaa kan lei ṭhin lêta ration buhfai man za-a za a ZPM sorkarin a tih to tâk avangin kohhran hrang hrang Buhfaitham pawh a buhfaia pek ai chuan hmun tam takah a pawisaa thawh an pung nasa hle" a ti a. Buhfaithamah chhungkaw tam tak an buai phah titih nia sawiin, hmun tam takah buhfaitham lak man tih to a ngai mai pawh sawrkarin inenlet nan hmang thar leh sela an duh thu a sawi bawk.#zabilianz

Sawrkar kudam-ah a huna sem chhuah tur buhfai a awm lo titih fo nia sawiin, sorkar inthlahdah vang-ah Congress thalai President chuan a puh a. December ni 20, 2024 thlengin thingtlangah leh Aizawl hmun thenkhat ami ten ration buhfai an la lak loh thu an hria nia sawiin, "Kristian-te hunpui kan hman dawn laia kan mamawh ber Buhfai khamkhawp kan hmu lo mai dawn emaw tih tur khawpa mipui kan thlabar hman mai hi a pawi hle a. Kalphung thar sorkar hian, Mizoram kalphung a tih danglam nasat lutuk avangin miharsa zawkte tawrhna nasa takin a thleng mek zel a ni", a ti bawk a ni.#zabilianz #zabilianznews #zofatehuapzo