Mizoram - Myanmar border paltlang tur tan pass neih a ngai tawh dawn

#ZabilianZ Jan 04: Zokhawthar-a India leh Myanmar inkalpawhnaa mihring kaltlangna chu kumin January ni 1 atang khan venhimna khauh zawka kalpui a ni a, ramri paltlang tum ten border pass an neih a ngai tawh dawn.

Champhai District SP chuan thuchhuah siamin, sawrkar laipuia Home Ministry thuchhuak zulzuia Mizoram Home Department-in thuchhuah a siam angin India leh Myanmar ramri paltlang tumtute chuan border pass an neih ngei a ngaih tawh tur thu tarlan a ni.

Zokhawthar leh Hnahlan atanga ramri paltlang tur, India ram atanga lut leh chhuak tur te chuan ramri atanga KM 10 huam chhunga cheng an ni ngei tih finfiahna certificate, police station officer in-charge emaw, an chenna khaw roreltu emaw, khawtlang hruaitu sawrkar hriatpui emaw hnen atangin an nei ngei tur a ni a, an lehkha hmang hian ramri a duty ten border pass an lo siamsak thin tawh dawn a, hemi tel lo chuan ramri paltlang a theih tawh dawn lo a ni.#zabilianz

Thuchhuahin a tarlan danin, border pass hi ni 7 ral hmain pass an lakna hmunah thehlut lehin an chenna lamah an let leh tur a ni a. Border pass hi ni 7 chhung a nung anga, hetihlai hian KM 10 huam chhunga cheng ngei an ni tih finfiahna lehkha erawhchu kumkhat chhung atan hman theih a ni thung ang.

Ramri paltlangna hmun tur hi Thawhtanni atanga Inrinni zing dar 6 atanga chawhnu dar 3:30 thleng hawn thin tur niin, naupang kumtlinglo hnenah border pass hi pek theih a ni lova, puitling in an hruai thei anga, puitling pakhatin naupang pathum aia tam an hruai dawn a nih chuan border pass dang siam belh tur a ni.#zabilianz

Border pass hi Police, medical mi leh sa leh Assam Rifles a thawktu ten an buaipui thin dawn a, thupek bawhchhia emaw, zawmlote chu dan anga hrem emaw, border pass pek loh emaw a ni dawn a ni.#zabilianz #zabilianznews #zofatehuapzo