#ZabilianZ Aug 15: India rama sipai huaisen leh hnathawk tha chawimawina Kirti Chakra (Wheel of Glory) Award dawngtu zingah Captain Lalrinawma Sailo, Chanmari veng, Aizawl a tel.
Capt. Lalrinawma Sailo hi 4 Para (Special Forces)-a awm niin, a chawimawina dawn hi India rama Peacetime Gallantry Award sang ber dawttu (Second Highest Peacetime Gallantry Award) a ni.
Chief Minister Lalduhoma chuan social media kaltlanga lawmpuiin, Kirti Chakra dawngtu Capt Lalrinawma Sailo chu a lawmpuiin a chhuang hle tih a tarlang a. He chawimawina sang tak a dawng hian Mizo thalaite theihna ropui zia a tarlang a, theihtawp an chhuahna apiangah mi chunga leng thei an ni tih a lantir nia sawiin, a hmalam hun atan duhsakna a hlan bawk.
Home Minister K. Sapdanga leh Sports Minister Lalnghinglova Hmar te pawhin Captain Lalrinawma Sailo chu lawmpuiin, India ram huap chawimawina sang dawng thei Mizo tlangval chu an chhuan bakah duhsakna an hlan a ni.
President Droupoadi Murmu chuan kumin hian gallantry award dawng tura thlan mi 127 a pawmpui a, distinguished service award dawng tura thlan mi 40 a pawmpui bawk.
Capt. Lalrinawma Sailo bakah hian midang pathumin - Lt. Shashank Tiwari, Lance Naik Meenatchi Sundaram A leh Sepoy Janjal Pravin Prabhakar ten Kirti Chakra hi an dawng a ni.#zabilianz #zabilianznews #zofatehuapzo
0 Comments