#ZabilianZ June 30, 2026: Home Minister K. Sapdanga'n "He Remna Ni-ah hian, remna siam tura ralthuam tunga rawn penchhuak MNF-te chungah lawmthu kan sawi a, an rawn penchhuahna kawng lo sialsaka, lalthuthleng kiantu Pu Lal Thanhawla inpekna kha kan chawimawi nawn leh a ni" a ti.
LPS Arena, Falkland-a MZP buatsaih Remna Ni a hmanpuinaah he thu hi vawiin khan Home Minister chuan a sawi a. "Kohhran hruaitute, Mizo Zirlai Pawl leh remna atana thawktu dang zawng zawngte pawh kan chawimawi" tiin, "Mizoram buaina titawp tura remna thuthlung chu thuthlung tha ber pawl a ni kher lo maithei a, remna thuthlung zawm hlawh ber zing ami chu a ni" a ti.
Home Minister chuan remna thuthlung zawm that chuan Mizo te hnam rinawm nihna a tarlang nia sawiin, "kum 40 a tlin thlengin Remna Ni hlim tak leh lungrual takin kan lawm thei a, a hlu takzet a ni, " a ti a. Zirlaite chu Mizoram buai chanchin ziahna lehkhabu chhiar thin turin a chah bawk.#zabilianznews
Sorkar hnathawk lak chungchang pawh sawiin, Home Minister chuan "thianghlim takin, a tling apiangte a indawtin kan la zel ang" a ti a. "Tling lo zawk duhsak vanga lak ang hi na taka dodal zel a ni ang, chu chuan zirlaite tan kawng dik zau takin a hawng anga, hah taka zir hi awmzia neihtir kan tum" tiin, "Thalaite lo pen chhuak ula, dikna kawngka zau takin lo hawn zel a ni ang, dikna kenkawh avanga tawrh a ngai a nih pawhin, thangthar te tan kan tuar zel mai ang" a ti a. Zirlaite chu ruihhlo laka inthiarfihlim turin a chah bawk.
MZP buatsaih Remna Ni lawmnaah hian remna atana thahnemngai taka thawktu zing ami Rev. Dr CL. Rema chu chawimawina hlan a ni a, Home Minister chuan a lawmpui thu a sawi bawk a ni.#zabilianz #zabilianznews #zofatehuapzo
0 Comments