#ZabilianZ July 10: Mobile phone bo chhui chhuah kawngah C/35 Ramengmawii, Bawngkawn Police Station ami chuan a thawhhlawk hle tih Police hotu ten sawiin, a taimakna leh thawhrimna avangin thla li chhungin mobile phone bo 120 a chhui chhuak niin an sawi a, a hnathawh that avang hian vawiin khan chawimawina reward an hlan.
Ni hnih awh tur Aizawl district crime review meeting vawiina neih tanah DIG (Northern Range)Ashok Malik chuan Ramengmawii hnenah hian reward hi a hlan a ni.
Aizawl khawpui chhunga Police Station hrang hrang ten CEIR (Central Equipment Identity Register) hmangin mobile phone bo 284 chhui chhuak tawhin, a neitute an pelet tawh a. Hemi kawngah hian Bawngkawn Police Station chu a ti tha ber niin, CEIR hmangin mobile phone bo 143 an chhui chhuak tawh a, Aizawl Police Station-in 104 an chhui chhuak tawh bawk.
Aizawl district-a Police Station hrang hrangah kumin January atanga June thla thleng khan thubuai 818 ziahluh a ni a. Thubuai ziahluh zingah inrawk leh rukruk thubuai tam berin, za-a 65 a tling a, rukruk thubuai za-a 14 chu lirthei ruk thubuai a ni.
Kumin January atanga June thla thlenga Aizawl district-a Police station hrang hranga thubuai ziahluh 818 zinga 107 chu Court-in chingfel tawhin, heng zinga za-a 89-ah thil tisualtua puh te thiamloh chantir an ni a. Kumin-ah ILP vawi 41 enfiah tawh niin, dan bawhchhia mi 195 man an ni tawh bawk.#zabilianz #zabilianznews #zofatehuapzo
0 Comments