#ZabilianZ June 08, 2026: Saitual Police Special Team ten tun thla ni 5 zan dar 10 vel khan Kualmawi, Keifang-ah lirthei te endikin, Manipur atanga Aizawl lam pan Ashok Leyland truck AS-01 SC 8530 atangin heroin nia hriat bawm 35, gram 427 a rit, tualchhung rate-a Rs. 85,40,000 man vel nia chhut leh opium fluid nia hriat fun 6, Kg 3.288 a rit, tualchhung rate-a Rs. 16,44,000 man vel nia chhut an man.
Ruihlote hi driver thutna hnunglam pindan phen (driver's cabin lining) chhung leh truck body dinglam pawn lama toolbox siamah te thuhruk a nih thu Police chuan an sawi a. Truck khalhtu Gautam Borah (32), Kamrup, Assam mi Dohotia, Jorhat, Assam-a cheng leh Manab Jyoti Dutta (31) Jagduwar Habi Miching, Jorhat District, Assam te an man tel bawk.
Tun thla ni 5 vek, zing lam dar 12:10 vel khan Vaphai khuaa ruihhlo do pawl ten Vaphai khaw dai, Saikhumphai lama ruihlo phur nia an rinhlelh Bolero Camper an lo dan chu Dungtlang Police ten bawhzui nghalin, hmarcha ro kara thuhruk, heroin bawm 50 (gram 618) leh methamphetamine bawm 4 (kg 4.74) an man a. He lirthei khalhtu Chungnawl (41), Singai, Myanmar leh a mi phurh Hmingsangliana (38), Vaphai khua nia inchhal te an man bawk.
He thil kaihhnawihah hian Dungtlang Police Station-ah NDPS Act Immigration and Foreigners Act tlawhchhana thubuai ziahluh a ni.
Tun thla ni 5 vek zing dar 3 vel khan Zote khaw dai Assam Rifles Check Post, Tiau lui panna kawngah Champhai Police-in Taxi pakhat atangin heroin bawm 5 (gram 66) leh a neitu nia puh Dimsianzovi (32), Jail Veng, Champhai chu manin, thubuai ziahluh a ni bawk.#zabilianz #zabilianznews #zofatehuapzo
0 Comments