SIR 2026 : MZP-in voter pun danah CEO thusawi a diklo niin an hria - Chakma tamna khuaah voter 376.92% a punna te a awm

#ZabilianZ July 8, 2026: MZP-in Chief Electoral Officer Garima Gupta-i'n Special Intensive Revision (SIR) 2026 chungchang press conference-ah mihring pun dan pangngai baka punna a awm lo nia a sawi chu dik tawk lova an hriat thu an sawi.

MZP chuan vawiin khan an pisa-ah thuthar thehdarhtute kawmin, SIR 2026 draft electoral roll chu an zirchian thu leh CEO Garima Gupta-i'n mihring pun dan pangngai baka punna a awm lo nia a sawi chu dik tawk lova an hriat thu an sawi a. Chhim lama Chakma tamna khuaa mihring punna chu a sang hle nia sawiin, "Sumasumy khua, 2005-a voter 52 awmnaah chuan draft roll hnuhnungberah voter 248 a awm tawh" tiin, an punna hi zaa- 376.92 a nih thu an sawi.#zabilianznews

Sumasumy bakah hian zaa 200 aia tama voter punna khaw 7 a awm thu sawiin, zaa 100 aia tama voter punna khaw 16 a awm niin MZP chuan an sawi bawk.

Khaw 95 an zirchian atangin zaa 50 aia tama voter punna khaw 30 chuang a awm thu an sawi a. Mizo tamna khua apiangah voter punna a hniam a, zaa 10 atanga zaa 20 bak a pung lo niin MZP chuan an sawi.#zabilianznews

MLA bial panga-ah mapping an ti tha tawk lo nia sawiin, July ni 4, 2026 atanga August ni 4, 2026 inkara vote nei thei lo te hming paih leh inthun thar duh leh siamthat duh nei te hearing neih turah ERO, AERO leh BLO te chu fimkhur taka hma la turin an ngen a. YLA leh Chakma zirlaite nen pawh hemi vil tur hian an thawkho dawn tih an sawi bawk

CEO Garima Gupta chuan SIR 2026 kalpui mekah rilru a pe tawk lo nia an hriat thu pawh MZP chuan sawiin, office a luahlum tawk lo niin an sawi a. SIR 2026 buaipui zawhfel fel a nih hma chu hna tha taka vil tura an phut thu an sawi a ni.#zabilianz #zabilianznews #zofatehuapzo