Bawlhhlawh chi 4-a thliarhran leh in tina bawlhhlawh lakkhawm kalpui tan dawn

#ZabilianZ Sept 17, 2026: Aizawl Municipal Corporation Ward no. 3, 6, 8, 11, 13, 16 leh 18-ah te bawlhhlawh chi 4-a thliarhran leh in tina bawlhhlawh lakkhawm kalpui tan a ni dawn a, UD&PA Minister K. Sapdanga'n vawiin khan a hawng.

Ward - 3, 6, 8, 11, 13, 16 leh 18-ah te hian bawlhhlawh chu chi li – tawih thei (wet waste); tawih theilo - sawngbawl theih (dry waste); tawih thei lo, uluk taka fun that ngai (sanitary waste) leh ram leilung leh mihring hriselna atana hlauhawm (special care waste)-ah te thliarhran nghal tur a nih thu AMC hotute chuan an sawi a. Local Council te ruahmannain in tin-ah bawlhhlawh thliar sa khawn nghal tur a nih thu an sawi bawk.

UD&PA Minister K. Sapdanga chuan bawlhhlawh thliarhran leh intina khawn khawm chu Mizoram tana mellung thar kaina tur a nih thu a sawi a. Faina chu ram leh chhungkaw changkang leh changkang lo tehna a nih zel thu sawiin, hun rei tawh tak atangin Mizo nu te chu an bungbel faina kawngah an lo inel tawh tih sawiin, tunhnaia India ram state capital fai tehnaah Aizawl chu 9-na a nih thu leh 1-na ni ngei tura theihtawp chhuah a tul thu a sawi.#zabilianznews

K. Sapdanga chuan "bung thar kan kai turah hian harsatna kan tawk ve ang tih chu hriat sa a ni; Mizo te tlawmngaihna hi faina nena kan suihzawm tlat erawh chuan kan fai anga, kan faina a nghet bawk dawn a ni" a ti a. In tina bawlhhlawh khawntute pawh tlawmngaihna nen thawk tura a duh thu a sawi.

Kohhran leh pawl hrang hrang te leh social activist te nen thawhhona tha tak neih a tul thu pawh sawiin, faina kawnga sorkar hmalakna hrang hrangin a tum ber chu faina chu chin than (habit) a neih a nih thu a sawi a. "Thalaite hi faina kawngah an chhuanawm hle a ni" a ti bawk.

Bawlhhlawh chi li-a thliarhran leh in tina bawlhhlawh khawn tur hawnna hu hi Municipal Commissioner Joseph H. Lalramsanga'n kaihhruaiin, Chief Secretary Khilli Ram Meena, Aizawl Mayor H. Lalremtluanga te pawhin thu an sawi a ni.#zabilianz #zabilianznews #zofatehuapzo