Health Minister-in ram pawna thawk thei turin online course hrang hrang leh hnamdang tawngte zir turin nursing zirlai te a chah

#ZabilianZ Sept 2, 2026: Health Minister Lalrinpuii'n India ram bakah foreign thlengin nurse te tan hnathawh tur tam tak a awm thu sawiin, ram pawna hnathawk thei tura an zirlai piahlamah online course chi hrang hrang leh hnamdang tawngte zir thin turin nursing zirlai te a chah.

Mizoram College of Nursing, Falkawna zirchhuakte thlahna leh zirlai thar lawmluhna hun vawiina a hmanpuinaah he thu hi Health Minister chuan a sawi a. Nurse te chu damlote nat ber lai leh damlo chhungte hlauhthawn ber laia thlamuan thintu an nih thu sawiin, nurse hnathawk tur chuan finna bakah midangte hriatthiamna neih a tul thu a sawi a. Damlote chu eng ang mi pawh ni se, mihring an nihna zah tak leh ngilnei taka enkawl thin turin a chah.#zabilianznews

Nursing zir chhuak te chu an nunah thil tum nei tura chahin, khawi hmunah pawh thawk se, an dinhmun hruai thlengtu an zirtirtute, an chhungte leh an thenawm khawvengte theihnghilh lo turin Health Minister chuan a chah bawk.

MCON Principal Lalduhsaki'n a sawi danin, kum 2005-a MCON kalpui tan a nih atangin mi 528 in an zirchhuak tawh a. Kumin atangin Mizorama a hmasaber ni turin seat 10 awmna Master of Science (Nursing) an hawng a, nikum lamah pawh Post Basic B.Sc Nursing an lo hawng tawh bawk. Thawktu - teaching staff 21 leh non-teaching staff 29 an awm mek session kalmekah zirlai 198 awmin, state pawn atangin PM special scholarship (PMSS) scheme hnuaiah Jammu and Kashmir leh Ladakh atangin zirlai 7 an awm.#zabilianznews

MCON atanga zirchhuak tawh zinga 92 chuan sorkar hna an zawm a, 265 te chu contract leh private hospital-ah an thawk a. State pawna hnathawk 87 leh ram pawna hnathawk 70 an awm bawk.

Zirlai chhuak tur thlahna leh zirlai thar lawmluhnaah hian B.Sc Nursing 2026 exam-a year tina tithate hnenah ‘L.Chhawnkima Award’ hlan an ni a. B.Sc Nursing 1st - 8th Semester University exam-a Mizorama 3-na hnena an hlan thin Academic Excellence Award chu PC Lalnuntluangi hnenah hlan a ni. MZU exam 2026 result chhuak hnuhnungberah MCON zirlai ten pahnihna, palina leh pasarihna an hauh a. Zirlai 16 (zaa 50) distinction-ah an pass bawk a ni.#zabilianz #zabilianznews #zofatehuapzo