#ZabilianZ Sept 10, 2026: Nizan khan Reiek piah, Lungphun khaw daia labour camp-a awm, kawng siam hna thawk hnamdang te intibuaiin an zinga pakhat chu a ke vuak tliah a nih hnuah kham-ah paih a ni a, tukin khan thi-a hmuh a ni.
A thian te kuttuar-a thi nia sawi hi Nepal lam mi a nih thu Lungphun YMA hruaitute chuan sawiin, zanin-ah Lungphun community hall-ah an lumen ang a, naktukah Kanghmun PHC-a post-mortem a nih hnu-ah an khaw lama thawn tura ruahman a nih thu an sawi.
Labour camp-a awm te buaina hi tukin lamah an hria tih YMA hruaitute chuan sawiin, camp-a awm zinga pahnihin maxi-cab hmangin Aizawl lam an pan tih an hriat avangin kawng siamtu company lam ten an umzui a. YMA lamin an chuanna maxi-cab khalhtu phone-a biain thil awmdan an hrilh bawk a, a umtu te chuan Reiek pelh, Vaipuanpho bulah an umpha niin an sawi bawk.
He thil thleng hi West Phaileng Police te hriattir an nih hnu ah Police ten Lungphun hi pan nghalin, Aizawl lam atangin forensic lam mithiam te an kal bawk a. He thu buatsaih lai thleng hian buaipui tur tul te an la buaipui mek a. Lungphun YMA ten kuang siamin, Police leh forensic lam mi te zanriah an buatsaihsak bawk a ni.#zabilianz#zabilianznews#zofatehuapzo
0 Comments