Kawtkaia bawlhhlawh lakhawma paihsak thintu 'Aizawl Garbo' in veng 18 vel tuam tawh

#ZabilianZ April 24: Sorkar nghenchhan lova mimal, Aizawl veng hrang hrang bawlhhlawh paihtu Aizawl Garbo-in thla hnih an tling awrh tihah Aizawl veng 18 vel an tuam tawh.

Aizawl Garbo hi C. Lalmuankima te chhung, Ramhlun Venglai, Aizawl-in kumin February ni 14 atanga an kalpui tan kha a ni a. Tunah hian AMC huam chhunga veng hrang hrang 18 vel an tuam tawh tih C. Lalmuankima chuan sawiin, sum nei saa ti an nih loh avangin a mamawhtute beiseina pawh duhthusamin an la tihlawhtling vek thei lo niin a sawi.

Bawlhhlawh paih man bithliah chungchangah pawh a theih chin chinah mi rawn awm te an rawn kual hmasak thu sawiin, in lam bawhhlawh (domestic) leh sumdawnna hmuna bawlhhlawh (commercial) tea thenin a rate pawh a inanglo tih a sawi a. Kar khata vawikhat paih, vawihnih paih leh vawi thum paih tea an then thu sawiin, tuna an rate chu an enchhinna a la nih avanga la ennawn leh tur a nih thu leh tunah rih chuan an rate then hrang hrangah Rs. 500 aia sang a awm loh thu a sawi.

Bawlhhlawh te chu zan lamah an lakhawm thin tih sawiin, an motor neih sa bakah thalai, zan lama inhlawh duh te nen tanghova bawlhhlawh khawnkhawm hna chu an kalpui rih thu a sawi bawk.

Khawpui a thanga, bawlhhlawh pawh a pun ve zel avangin AMC hnuaia bawlhhlawh paih motor te pawh an indaih tawh niin a lang a. Chenna hmunin a zir loh avang te leh hna tul avangtea bawlhhlawh paih motor chan remchang lo te pawh an awm ve tak zel avangin bawlhhlawh paih tur khawn khawm hna chu 'Aizawl Garbo' tia a kalpui a nih thu C. Lalmuankima chuan a sawi bawk a ni.