Bana kaih policy-in mipui thleng phak lovin, an duhsak zawngte banah chauh an kai :MPCC Treasurer

#ZabilianZ Nov 28: MPCC Treasurer Dr. Lalmalsawma Nghaka'n sawrkar hmalakna bana kaih policy chuan mipui thleng phak lovin, an duhsak zawngte banah chauh an kai niin a sawi a. Sawrkar chu mipui nawlpui ban phaklohin ban a pharsan ta emaw tih turin a awm niin a sawi.

Aizawl South II Congress hruaitu te intawhkhawm, Rokunga Hall, Venghnuai-a vawiina neih a hmanpuinaah he thu hi MPCC Treasurer Dr. Lalmalsawma Nghaka chuan a sawi a. "Mi nawlpui banah an kai ang tih hlau niawm fahranin thlai thar an lei dan turah te, hand holding loan pek dan turah te thil a harsa zawngin an ti thiam a, hetiang a nih mek lai hian party-a an hotu rual te chu nihna pawimawh tak tak pein, Adviser to CM te, Board Chairman te, Consultant te, OSD te leh adt. dinhmun tha zawk, hlawh sang zawk an neih theih nan an banah an kai thung a ni" a ti.

MPCC Treasurer chuan "Restricted tender maksak te kalpuiin, work supervisor tih hming chawi tirin an duhsak zawng te contract leh supply hmangin an dinhmun an siam lensak thur thur mek a, 'Kalphung Thar' an tih hi 'Kalphung Maksak tak' a ni chho mek a ni" a ti a. "Mipuite hnenah vote zawn nan CM Special Package an tawktarh a, a kalphung hian mipui thleng phak lovin, an duhsak zawng mi tlem te tan an siam a, inthlan apiangin vote zawn nan ber hmangin, 'Rulh ngai lo loan' tiin an campaign mek a ni" a ti bawk.#zabilianz

Sawrkarin thalaite tana handhold loan an sawi chu Central sorkar scheme awmsa - PMEGP, CGTMSE leh a dang te an rinchhan niin MPCC Treasurer chuan a sawi a. "Handhold loan hian kalphung a nei lova, he loan diltute hian handhold loan kaltlang lova, mimal anga mahnia an dil theih thil a ni, a ti.

Congress an sorkar laiin Health Care Bill nghah nan a rei berah thla khat vel bak hun a duh lo nia sawiin, "MNF-ah khan a kuma kum nghah a ngai a, ZPM hian an sorkar atanga thla 9-ah Rs. Nuai 1 an rawn siam ve chauh a, Cheng nuai 1 hi natna khirh tuar tan a beitham lulai a ni" a ti bawk.#zabilianz

Tunlaiin sorkar hnathawk vau a thleng mek nia sawiin MPCC Treasurer chuan "kan Chief Minister Pu Lalduhoma'n 'sorkar hnathawk chhawrtlak loh te ban mai tha kan ti' a ti a, a dikna chen a awm a, zirchian ngai tak thil a ni maithei. Sorkar hnathawk ban an tum a nih chuan mipuite tana tangkaina awm lo, mipuiin ram tana an hnathawh hriat tur awm si lo Adviser to CM, Consultant, Board chairman, Consultant leh OSD engemawzat awm te hi ban hmasa phawt rawh se, an ni enkawl nan hian mipui sum tam tak senral a ni" a ti a. "An duhsak te hum tum rana, sorkar hnathawkte tlinlohna leh fellohna zawng reng renga an hmanhlel hi a pawi hle, anmahni atangin bul an tan a ngai a ni", a ti.

Dr. Lalmalsawma chuan "Congress khan NLUP kan sem dawn khan keimahni kan inhrek hmasa a, thil tih tur kan sawi pung pung ve lova, a tihin kan ti chat chat thin" a ti a. "Tuna CM leh CM hmasa zawk khan sawi thiam lam ni lovin, a tiha tih a ni zawk tih lo hre rawh se" a ti bawk a ni.#zabilianz #zabilianznews #zofatehuapzo