GST registration nei lo hnenah eng contract hna mah pek loh tur :Chief Minister

#ZabilianZ Jan 20: Chief Minister Lalduhoma'n "GST registration nei lo hnenah eng contract hna mah pek loh tur" a ti a. "Contract diltu chuan GST registration an nei ngei tur a ni" a ti.

Disaster Management & Rehabilitation (DM & R) leh Department of Personnel & Administrative Reforms (DP & AR) te review meeting a neihpuinaah he thu hi vawiin khan Chief Minister chuan a sawi a. "Contract hna atangin chhiah tam tak a hmuh theih a, chan kan phal lo" a ti.

Agreement tha tak nen chauh contract hna pek tawh tur a nih thu Chief Minister chuan sawiin, "contractor lam chan tha sa ranin agreement hi kan ziak fova, a phenah thil rinhlelhawm tak a lo awm duh viau lehnghal" a ti a. A neitu, a pawisa tumtu sawrkar chu a dawih zawkah a tang fo nia sawiin, hrem chakawm tak tak pawh an hrem ngam loh phah niin a sawi.#zabilianz

One department, one bank system pawh kalpui thaa an hriat thu leh hriattirna tihchhuah thuai an tum thu Chief Minister chuan a sawi a. Hna a chak zawk nan Mizoram PWD manual pawn an duang mek nia sawiin, bungrua pawh factory-a lei phalna thlenga neih an duh thu leh hei hian bungraw lakkhawm dan kalkawng thui lutuk leh muang lutuk thin a tihziaawm an beisei thu a sawi.

Chief Minister chuan "kan thil tih tinreng hian moral reformation a keng tel nghal a, kalphung tha zawk kan duang chho zel" a ti a. Thil dik an tihna tur dodaltute dim an tum loh thu sawiin, thil diklo siamtha tura dawrtute lakah erawh an inhawn zau thu a sawi.#zabilianz

Aikal lo la ru palh an awm em tih pawh an enthla zel nia sawiin, Chief Minister chuan officer pension tawh ten sawrkar facility an lo la kawl em tih te pawh an dap zel niin a sawi a. "Hun vawn dik pawh kan duh a, khauh zawkin kan kal a, kan zawm tha tlang hle, kan kengkawh zui zel dawn" a ti.

Chief Minister chuan e-office uar chhoh zel an duh thu pawh sawiin, officer te chu an hnuaia thawk an staff te welfare ngaipawimawh turin a chah a. Review meeting chu thil diklo zawng tura buatsaih a nih loh thu leh harsatna sutkian dan leh thawhho dan tha an zawnna a nih thu te, zalen taka engkim sawi tur a nih thu te a sawi.#zabilianz

Department tin te chu Service Review Committee din vek tura an tih thu leh sawrkar hnathawk, an hnaa chhawr tlak si loh te dapchhuaka, special pension scheme tha tak nena chawlhtira, an aia midang tha zawk, chhawr tlak ngei lak tha an tih thu Chief Minister chuan a sawi a. Integrity Pact ngaipawimawh turin department zawng zawng a chah a. "Hei hian induhsakna dik lo, unau leh laichin te diklo taka duhsakna a veng a ni" a ti.

Department tin ten an dinhmun, an pending project te, an leiba te, an hna kal meka an thlen chin te an hriatchian a tul thu sawiin, 2nd instalment nei chi hna te phei chu muangchan loh an duh thu a sawi a. "Muang fal bik tumah awm lo se, hmasawnna hna hi thawk thuai thuai ila kan duh a ni" Chief Minister chuan a ti.#zabilianz

Department ten project inang tak tak an thehlut thin nia sawiin, hetianga inhre tawn lova hma an lak hian sum leh pai, hun leh tha, tul lovah a luang ral thei tih Chief Minister chuan a sawi a. Project siam reng reng Planning Department-a thehluh hmasak zel tur a nih thu a sawi. "Hetiang tho hian CSR pawh CSR Cell-in hriatpui zel se kan ti, project inchhuhsak tumna a ni lo, mumal lehzuala kalna tur zawk a ni" a ti bawk.#zabilianz #zabilianznews #zofatehuapzo