#ZabilianZ March 09, 2026: MNF Treasurer leh Revenue Minister hlui Lalruatkima'n "Lengpui land scam chungchanga corruption awm anga inrinhlelhna chungchangah, MNF Treasurer leh Revenue Minister hlui ka nih angin chengkhat pawh party emaw mimal anga kan dawn ka hre lo. Mimal anga ka lo dawng a nih chuan a let sawm zeta rulh pawh ka inhuam" a ti a. "Kan CM leh Revenue Minister te hi hetiang hian an inhuam ve em? tih hi ka zawhna a ni," a ti.
MNF party chhung inkhawm vawiina neihah he thu hi MNF Treasurer chuan a sawi a. "Lengpui land scam' chungchangah ZPM sawrkar hmalakna diklo leh dan bawhchhiatna hrang hrang a awm" tiin, "land acquisition-ah hian preliminary notification hi a bultanna a ni a, ZPM sawrkar ngei hian ni ni 15/05/2025-ah khan a tichhuak a ni" a ti bawk.
Lalruatkima chuan "The Mizoram Land Revenue Laws, 2013 hnuaiah Indian Air Force te hian 'Outright Purchase' (a hmun leh hma inleisak tawp) hmangin ram an lei ngawt thei lo, land acquisition dan anga kalpui tur a ni" tiin, "Lengpui ram hi garden LSC a nih avangin land lease-a leh vek tur a ni a, heng dan te hi an hre chianglo nge ni, outright purchase a hralh tur ang maia sawrkar an puh duh mai hi thil mak tak a ni", a ti a. "Sawrkar hmasaah khan Mizoram tana bituk liau liau The Mizoram (Land Acquisition, Rehabilitation & Resettlement) Act, 2016 kha siam a ni a. Guwhati High Court-a thutlukna avanga harsatna a awm pawhin, kan hnam tana thil pawimawh Article 371G neitu kan nihna hre reng chungin hma lak a ni thin" a ti.
MNF Treasurer chuan "sawrkar kan hrawn mek hian ‘responsibility’ leh ‘transparency’ vawnnun aiin, thil diklo a awm apianga sawrkar hmasa mawhchhiat leh midang puh hi an kalpui ber a ni" tiin, "Lengpui ram IAF tana lak (land acquisition) chungchangah pawh CM leh Revenue Minister ten DC-te mawhphurhna anga an sawi kha thil mak tak a ni" a ti bawk.#zabilianz #zabilianznews #zofatehuapzo
0 Comments