Faina Thlentute Ni-ah Faina Thlentute chawimawi
1.jpg)
#ZabilianZ Dec 20: PHE Department leh Central YMA ṭangkawpin nizan khan rampum huap faina lama hma la ṭha te chawimawina hun -Faina Thlentute Ni- an hmang a, PHE Minister Prof. Lalnilawma'n hmanpuiin, phutlet nei lo leh mahni ṭhahnemngaihnaa khua/veng faina atana hma la ṭhin mi 46 te chawimawina hlan an ni.
He hun hmanpuitu PHE Minister Prof. Lalnilawma chuan “Kan ram fai tur hian sawrkar hmalaknain programme hrang hrangte duan a lo ni tawh thin a, nasa takin hma min sawn tir bakah, sawrkar, khawtlang hruaitute leh mimal thahnemngaite ṭanrualna vang a ni" a ti a. Ram leh hnam hmasawn tur chuan a chhunga cheng mipuite zawng zawng an pawimawh thu sawiin, "kan theihna zawnah ṭheuh ṭhahnemngaihna nen theihtawp kan chhuah hian rahbi thar kan kai thin" a ti.
Faina Thlentute Ni hi kumin kumtir Pawlkut thla ni 27 (zirtawpni) khan PHED leh CYMA Coordination Committee chuan hman a rel a, thlanchhuah hna chu ram pum hrut chhuaka puanzar niin, a dap chhuah hna pawh CYMA kaltlangin branch hrang hrangah neih a ni a. Tlawmngai pawl dang YLA, MTP leh YCA ten anmahni branch ṭheuhah an lo kalpui ve bawk.
He hun hi kumin Khuangchawi thla ni 12, 2023 (Ningani)-a hman tura ruahman hmasak ni mahse, MLA inthlan puan a nih tak avangin nizan kan hman a ni ta zawk a ni. Faina Thlentu chawimawite hian chawimawina thuziak bakah sum fai, memento, thangchhuah diar leh puanchei te an dawng a, CYMA leh PHED CorCom chuan he hun hmang hian faina lamah mipuite kaihharha an awm chu an tum ber a nih thu an sawi.
Faina Thlentute Ni hmannaah hian YMA lam aiawhin CYMA Vice President Prof. Lalnuntluanga pawhin thu a sawi a. Er. Lalrothanga, Chairman, PHED & CYMA CorCom-in a tawp kharna hun a hman thung.
PHE Department Secretary Er. C. Lalremsiama kaihhruai Faina Thlentute Ni hmannaah hian sorkar hnathawk lian hrang hrang bakah Aizawla branch YMA hruaitute leh zirna in lama hotu ṭhenkhatte pawh an tel a ni.
Comments
Post a Comment