HPC (D) lakah YMA a lungawilo hle - ruihhlo do kawnga hmalakna do zawnga che te CYMA-in a hmachhawn zel dawn

#ZabilianZ Oct 20, 2026: Central YMA-in ruihhlo do kawnga hmalakna dodal zawng emaw ruihhlo dotute tana harsatna siam zawnga che te chu eng ang mi pawh ni se CYMA-in a hmachhawn zel tur thu an sawi.

Sakawrdai Hmar veng YMA Z section-a Information Secretary nilai Ngursangzuol Sanate - tun thla ni 16 zana ruihhlo kaihhnawih avanga mi kuttuara a thi chu pawi an tih thu CYMA chuan an sawi a. A kalsan a chhungte an tawhrpui thu sawiin, he thihna a inhnamhnawih ten an phu tawk hremna an hmuh ngei theihna tura CYMA-in hma a lak tur thu an sawi bawk.

Ngursangzuol Sanate hi Lungthulien, Manipur mi niin, Sakawrdai-ah a tul tul thawkin kum 3 vel a awm tawh a. Tun thla ni 16 zan khan HPC (D) mi leh sa ten a in atanga hruai chhuakin, an khua Lungthulien leh Sipuikawn inkârah an that niin thudawnna chuan a sawi.

Jt. YMA, Sakawrdai chuan an member rawng taka thah a ni chu an hrethiamlo hle tih sawiin, "a in atanga hruaichhuaktu RC Lalropuia, HPC (D) a inrawlh ngei niin kan hria" an ti a. A hruai chhuaktu chu a hruai chhuah chhan dik tak (pawm tlak ngei) sawifiah tura phutin, a sawifiah thei lo a nih chuan Sakawrdai khaw chhungah a luh an rem ti tawh dawn lo tih an sawi bawk.

He thil thleng hi ruihhlo tawlh ruk nen inzawm ngeia an hriat thu Jt. YMA, Sakawrdai chuan sawiin, YMA chu an ngawi mai mai dawn lo tih an sawi a. HPC (D) mi leh sa thenkhat ruihhlo zawrh kawnga inhnamhnawih an awm tih an hriat thu leh Sakawrdai khaw chhunga an luh an remtih loh thu an sawi.

Sakawrdai mi pawh ruihhlo tawlhruk kawnga inhnamhnawih an awm tih an hriat thu YMA chuan sawiin, sim turin an hriattir a. An sim lo a nih chuan a na thei ang bera an chungthu rel a nih tur thu an sawi bawk a ni.

#centralyma #ruihhlodo #zabilianznews #zofatehuapzo