Rev. Dr. Zaichhawna Hlawndo ziak lehkhabu leh a hla phuah tlangzarh

#ZabilianZ Oct 15, 2026: Rev. Dr. Zaichhawna Hlawndo lehkhabu ziah 'The True Identity of Zofate' tih chu vawiin khan Dr. Zoramdinthara'n a tlangzarh a. Rev. Dr. Zaichhawna Hlawndo hlaphuah 'that theih miahlohna bawm' tih chu a thluk siamtu leh satu Zo-Rock - Rosangliana'n a tlangzarh bawk.

Rev. Dr. Zaichhawna Hlawndo lehkhabu ziah hi Zofate ṭobul chhuina, Zofate nihna chungchang mithiam rual ten an zirbingna bihchianna te, Zofate Israel hnambo an nih leh nih loh zirchianna te, Zo hnahthlak peng hrang hrang te chanchin leh Mizorama political party hrang hrang chanchin te ziahna a ni a. He lehkhabu ziak tur hian lehkhabu za lai a rawn niin a ziaktu chuan a sawi.

Rev. Dr. Zaichhawna Hlawndo lehkhabu ziah tlangzarhtu Dr. Zoramdinthara chuan Zofate tana lehkhabu pawimawh a ni dawn nia sawiin, - University, College leh High School naupangte tan pawh lehkhabu rawn tlak tak tur a nih thu a sawi a. Mizoram University tan bu engngemawzat an lei tur thu a sawi bawk.

Rev. Dr. Zaichhawna Hlawndo hlaphuah 'that theih miahlohna bawm' chu party politics leh party sorkar ṭhatlohna te, kristianna leh Zo nun ze mawi ṭhiattu a nihna puanchhuahna hla, party sorkar siam tawh lova Pathian Lalram sorkar din tura Zofate chona hla a ni thung.#zabilianz #zabilianznews #zofatehuapzo