Kum 2028-ah Mizoramah BJP sorkar a pian theihna turin central-a kan hruaitu ten min pui dawn :Dr. K Beichhua

#ZabilianZ Aug 28, 2026: BJP Mizoram President Dr. K Beichhua-a'n "kum 2028-ah Mizoramah BJP sorkar a pian theihna turin central-a kan hruaitu ten min pui dawn" a ti.

Aizawl-a BJP office - Mipui Run-a political session vawiina neihah he thu hi BJP Mizoram President chuan a sawi a. BJP National President thar Nitin Nabin hova Delhi-a national meeting-ah a tel thu leh BJP Mizoram President a nih hnu kum khat chhunga an hmalaknaah central hruaitute an lawm hle nia sawiin, "hei hi BJP Mizoram chhungkua te thawhhona ṭhat vang leh inlungrualna vang a ni" a ti.

Dr. K. Beichhua chuan, India ramah sorkar leh tura beiseiawm ber chu BJP nia sawiin, "Mizoramah pawh chutiang tho chu kan ni mek" a ti a. Mizoram siamṭha tura a taka hnathawk thei tura beiseiawm ber chu BJP niin a sawi.#zabilianznews

Tunhnaia Gen Z te thil ngiat chu BJP Central hruaitute chuan insiamṭhatna atan an hmang nia sawiin, "BJP National President Nitin Nabin leh a team te hian theihtawp chhuahin thalai te politics an luhchilh dawn" a ti a. "Thalaite tan thil ṭha zâwk duangin, siamṭhat ngai siam ṭha zelin India rama thalai te beiseina tihhlawhtlin zel an tum dawn a ni" a ti bawk.

ZPM chu kum thum dawn an sorkar tawh chungin an lakah mipuiin an beisei ang an la hmu lo nia sawiin, tun anga an kal zel a nih hmuh pawh rinawm vak lo niin a sawi a. Sorkar lo siam tawh Congress leh MNF pawh mipuiin an hne a la reh lo nia sawiin, BJP hmabak a êng ber niin a sawi bawk a ni.#zabilianz #zabilianznews #zofatehuapzo