#ZabilianZ Sept 9, 2026: Tui inhleuhsiak - National Masters Championships 2026 - tun thla ni 11 atanga ni 13 thlenga neih tura tel turin Mizoram team-in vawiin khan Lengpui airport atangin Haryana an pan.
Swimming Federation of India (SFI) buatsaih National Masters Championships vawi 22-na hi Champions Aquatic Academy, Bahadurgarh, Haryana-a neih tur niin, Aquatic Association of Mizoram (AAM) atangin category hrang hranga tel tur mi pali an kal a. Mizoram team te hi AAM Coach pahnih - Lalrindika leh Lalrinpuii ten hovin anni pawh he inelnaah hian an tel ang.#zabilianznews
National Masters Championships-ah hian kum 25 chin tan tel theih niin, kum bithliah hrang hrang, kum 80 leh a chunglam category thlengin a awm a. Kum 50 chunglamah Mizoram atanga a vawikhatna atan AAM Adviser Dr. Vanlaltanpuii chu mtr 50 leh mtr 200 breaststroke ah te a tel dawn a ni.
Nikum lamah pawh tel tawh AAM Coach Lalrindika chu tuntumah hian mtr 50 leh mtr 100 Freestyle ah a tel dawn a. AAM Coach tho Lalrinpuii chu mtr 50 leh mtr 200 Breaststroke ah a tel thung ang a, mtr 50 Freestyle ah Lalrinfeli a tel dawn bawk.#zabilianz #zabilianznews #zofatehuapzo
0 Comments