NGHAM-in sorkarin rate tha pangngai, damdawi in engemawzat a pek ang a pe ve thei a nih chuan MUHCS zawm an hnial lo

#ZabilianZ Sept 2, 2026: Non-Government Hospital Association of Mizoram (NGHAM)-in sorkarin rate tha pangngai tak, Mizoram chhung leh pawna damdawi in engemawzat a pek ang a pe ve thei a nih chuan MUHCS zawm an hnial lo.

NGHAM chuan Mizoram Universal Healthcare Scheme (MUHCS) an zawm chuan mipui tan thatna tam tak a neih tur thu te, phaia pawisa tam zawk sen ngai lova Mizoram ngeia inenkawl a theih chuan mi tam tak tan malsawmna a nih tur thu leh ram economy-in a that phah tur thu te an sawi a. "Sorkarin rate tha pangngai tak, kohhran hospital thenkhat leh hospital dang te pawh a pek ang emaw, phaia hospital tam tak te a pek ang emaw min pe ve thei a nih chuan MUHCS zawm kan hnial lo" an ti a ni.

Mizorama private Hospital-te chu ram tan entreprenuership tihhmasawna a thawhhlawk pawl tak ni vea an inhriat thu pawh sawiin, "medical lamah hmasawnna tam tak thlentu kan nih piah lamah  thalai tam tak tan hna, a sang tel siamtu kan ni mek a ni" an ti a. Mizoram sorkar-in phai lam hospital te inremna a neihpui zulzuiin inremna siampui ve thei se an duh thu an sawi.

NGHAM chuan MUHCS an zawm ve theih hma pawhin Hospital thenkhat, MUHCS cashless a zawm lo, an hnena inenkawlte erawh MR bill thei si (deemed empanelled) hospital - Woodland Hospital, Shillong leh Silchar Cancer Institute te dinhmun ang tala dah turin sorkar chu an ngen a. MUHCS an la zawm ve theih loh avanga damlo tam tak leh an chhung ten an tuar thin chu pawi an tih thu an sawi bawk.

NGHAM Member Hospital, MUHCS la zawm ve lo 9 an awm a :
1) Trinity Hospital
2) Ebenezer Hospital
3) Greenwood Hospital
4) Aizawl Hospital
5) LRM Hospital
6) Agape Multispeciality Hospital
7) Rosewood Hospital
8) City Hospital
9) Aizawl Adventist Hospital te an ni.

#zabilianz #zabilianznews #zofatehuapzo