#ZabilianZ July 11: Kolasib district MJA hruaitu ten vawiin khan Kolasib Bawrhsap John LT Sanga hmuin, Kolasib khaw chhunga sorkar ram mimal hnena ṭheh tuma hmalakna a awm nia lang chungchang an sawipui.
Tunhnaiah KVK, Kolasib ram chu mi ṭhenkhatin neihsak tumin chhinchhiahna te pawh an lo kheng niin Kolasib Dist. MJA hruaitute chuan an sawi a. KVK ram chauh lo pawh Kolasib khaw chhungah sorkar department ram ṭhenkhat chu mimal hnena ṭheh tumna a awm nia an hriat thu pawh sawiin, dan tlawhchhan awm lova chetna hriat tur awm leh ṭhin chu ṭhalo an tih thu Bawrhsap chu an hrilh.
Kolasib Bawrhsap chuan tunhnaia KVK ram chhuh tumna awm nia sawi chu a hmunah SDC tirin a enfiah tir tawh tih Kolasib MJA hruaitute chu a lo hrilh a. Dan tlawhchhan mumal tak neia sorkar department ram te chu humhalh a nih thu leh sorkar deptt. ram reng reng, a neitu deptt. phalna lo chuan luahsak emaw chhuhluih tum chu dan bawhchhiatna a nih thu a sawi bawk.
KVK, Kolasib hotute chuan KVK rama chhinchhiahnate lo khengtute hi an hriatloh thu an sawi laiin, thudawnna pakhat chuan Kolasib Vengthar MNF unit te hmalakna niin a sawi a. Chhinchhiahna awm te atanga a lan dan chuan KVK ram, in hmun atana beiseitute chu mi 50 vel an nih hmel niin thudawnna chuan a sawi.
Hetihlai hian Kolasib bialtu MLA, Minister ni bawk K Lalrinliana chuan naktukah Kolasib-a KVK ram hi a tlawh dawn nia thudawn a ni a, a tour programme-ah 'Inhmun neilo ten inhmun an beiseina hmun KVK ram ka tlawh ang' tia a tarlan thu dawn a ni bawk.
0 Comments