#ZabilianZ Sept. 06: Dampa bial bye-election a ZPM Candidate tura ruat Vanlalsailova'n nimin khan Dampa bial chhunga khaw hrang hrang - Ailawng, Reiek, Hreichuk, Lungphun, Khawrihnim, West Lungdar, Bawlte leh Darlung khua te a tlawh a. Dampa bialtu MLA chatuan ram pan ta Lalrintluanga Sailo chu a pu, a chanchin a chhia a tha engkim ka hrilh ngamna niin a sawi.
Vanlalsailova chuan Dampa bialtu MLA-in chatuan ram a pan ta mai chu hriatthiam har a ti hle nia sawiin, "lusun chhung te Pathianin awmpui se tih hi kan tawngtaina a ni" a ti a. Dampa bial mipuite khawngaihna dilin, bial tan theihtawp a chhuah zel tur thu leh sawrkar tha chakna nen tun aia tam zawk hmasawnna thlen thei tura thawhpuiah a sawi a mi.
Dampa bial bye-election lo awm tura rorellai ZPM candidate hi Minister pathum - Vanlalhlana, Lalthansanga, B. Lalchhanzova leh MLA Lalmuanpuia Punte bakah party hruaitu ten an tawiawm a. Vanlalhlana chuan . "Politics-ah rem leh rem lova dawt leh thu belhchiandawllo hmanga inbeih kan sim a hun" tiin, "bye-election kan hmachhawn tur pawh ZPM chuan thianghlim takin kan hmachhawn tur a ni" a ti.
Forest Minister Lalthansanga chuan assembly session hnuhnungbera an pawm tak Forest Conservation Amendment Act, 2023 chungchang sawiin, "he dan hi kan ram tana thil tangkai zawk leh ram leilung fate tana malsawmna thlen tur zawk a ni" a ti a. "Hun hmasa lamah kha chuan hmasawnna hna thawh a nih dawnin Forest lamah harsatna eng eng emaw a awm thin a, tunah chuan khang harsatnate kha sutkian a lo ni dawn ta a ni," a ti bawk.
B. Lalchhanzova chuan, "ram pawn atanga ei leh bar lakluh thin zinga thenkhat chu keimahni ngei pawhin kan thar chhuah ve theih a ni" a ti a. Kuthnathawktute thawhrim zia an hriat thu leh an mit ngeia an hmuh thu a sawi.
Tunlaia lo zawh runpui hun buatsaih thin chu Mizo hnam nuna bet tlat, chawinun zel pawimawh a nih thu B. Lalchhanzova chuan sawiin, huau huau thil a nih loh thu a sawi a. "Kum khat chhungin hah takin hna kan thawk a, lo zawh ni ah hlim takin hnam hla leh zai te nen hun kan hmang hi a tha em em a ni" a ti.
Supply Minister B. Lalchhanzova chuan fur leh thalah ei leh bar lakluh lamah harsatna a thlen loh na turin hma an la zel tih sawiin, hmun hrang hranga sawrkar kudam te pawh an enfiah zel thu a sawi a. "Tun dinhmunah buhfai bikah chuan kan thla a phang lova, thil dang pawh harsatna kan neih loh na turin hma kan la mek a ni," a ti bawk.#zabilianz #zabilianznews #zofatehuapzo
0 Comments