Police-in youtube-a mipat hmeichhiatna lam hawi Mizo tawnga thu chhiar dah thinna channel pahnih neitute an man

#ZabilianZ May 16, 2026: Cyber Crime Police-in youtube channel thenkhata mipat hmeichhiatna lam hawi thawnthu ngialngan tak tak chhiar chhuah thin a nih thu an dawn bawhzuiin, hetiang lam hawi tihchhuah thinna channel pahnih neitute an man.

Mizoram Police thuchhuahin a tarlan danin, youtube channel pahnih - @NGAITHLASUHPUITLINGHUANG (PUITLUNG HUANG) leh @puitlinghuangzz (Naupang tiam loh) tih te chuan Mizo tawngin hetiang thawnthu phuahchawp chhiar chhuahna video tam tak an upload tih hmuhchhuah a ni.#zabilianznews

Heng video-te hi mipui en theih tura chhawpchhuah an ni a, mipuite rilru hruai khawlovin, a bik takin naupangte rilru a tihbuai theih avangin heng an thil tih te hi Bharatiya Nyaya Sanhita, 2023 leh Information Technology Act, 2000 hnuaia hrem theih a ni a. Cyber Crime Police Station chuan Case No.16/26 dt. 26.04.2026 u/s 294 BNS r/w 67 IT Act 2000 chu ziaklut nghalin, chhui zui nghal a ni.

Youtube puihna leh Investigating Officer-in technical investigation a tih te kaltlangin, account neitute chu May ni 14, 2026 khan hriatchhuah niin, youtube account @NGAITHLASUHPUITLINGHUANG tih siamtu leh enkawltu Henry Lalrinpuia (29), Hunthar veng, Aizawl chu May ni 15, 2026 ah man zui nghal a ni a. channel dang pakhat @puitlinghuangzz (Naupang tiam loh) siamtu leh enkawltu Vanlalhmangaihzuala (35), Chaltui, Phuldungsei pawh May ni 16, 2026 ah an man ve leh bawk a. Heng channel pahnih neitute mobile phone hmanlai pawh mansak niin, heng channel-a video te pawh mipui en theihlohva dah nghal a ni bawk.#zabilianz #zabilianznews #zofatehuapzo