MZP-in MPSC a thawk te Pisa kai tur an dang - Police nen innawr mahse, buaina lian zawk a chhuak lo

#ZabilianZ Aug 10, 2026: MZP bultumin vawiin khan zirlaite leh Mizoram Public Service Commission (MPSC) kaltlanga hna lak chungchanga harsatna tawk mi engemawzatin MPSC siamthat phutin, a thawktute Pisa kai tur an dang a. Police nen innawr deuh mahse, buaina lian zawk erawh a chhuak lo.

MZP chuan MPSC lamin inbiak an rawt thu leh Magistrate lamin inbiakna hmun tur pawh an ruahman fel hnuah MPSC hotu thenkhatin MZP hruaitute an biak buai lai takin MPSC Chairman leh Secretary bakah officer leh staff te chu MPSC Office-ah Police tha chakna hmanga luh luih an tum a. Police hotu pakhat chu “heng te hi in hlau em ni, tumah kha ding zum zut suh u, in hria em” tiin nasa takin a au niin MZP chuan an sawi.#zabilianznews

An innawr boruak a ziaawm deuh lai leh MPSC Chairman pawhin kal kian a tum lai takin, MZP President chu zirlaite lam hawia ban phara CM-in zirlaite kutthlak leh an chunga tharum thawh a duh loh thu a sawi thin thu a sawi lai takin Police lam chuan zirlaite chu nawr leh mahse, buaina lian zawk erawh a chhuak zui lo thung.

MZP chuan August ni 6, 2026-ah MPSC Chairman hnenah an thil phut te ziaka an thlen tawh thu sawiin, August ni 7 zan dar 11:20 ah chhanna sei tak whatsapp hmanga an dawn thu an sawi a. "Hei hi nasa takin a darh a, aspirant te harsatna sutkian tumna lam aiin mipui hriata insawifiah tumna leh thiamchan tumna-ah MZP chuan a ngai a ni" an ti.#zabilianznews

MZP thil phut te:

1. MPSC kalphung siamtha vek tura reform committee/commission din. Hemi chungchang hi Chief Minister, DP&AR changtu ni bawk hnenah ziakin an thlen.

2. One Time Registration (OTR) hman tlak a nih hma chuan tihtawpa need based specific application form siam an duh. MPSC in OTR a hman tan - June 2025 atangin aspirants tam takin harsatna an tawk, an ti a. MZP te leh midang dang rawtna avangin a form tlema thlak danglam ni mahse, a la famkim tawk  lo, an ti. Union Public Service Commission (UPSC) pawhin a lo hmang tawh thin mahse, engengemaw harsatna avangin Universal Registration Number (URN) hmanga thlak a ni, an ti bawk.

3. OTR a felfai loh avanga document upload kimlo ten offline-a document an thehluhna hun siamsak an phut. "OTR felfai loh avanga aspirants tam takin exam pawh hmachhawn lova education qualification a tling vek si, application an submit zawh veleha tlinglo tam tak awm nghal ringawt thin hi a fair lo" an ti a. "OTR changtlun tawk loh vang leh a changtlun tawk lohna ang anga MPSC atanga OTR hman dan tur instruction mumal tak a awm loh vanga thil thleng a nih angin candidate harsatna tawk leh mai tur te chu offline-a document submit na hun siamsak ngei se kan duh a ni" an ti.

4. Written exam-a tling tawh, OTR felfai loh avanga document upload kimlo reject tawh te tan offline-a document submit na hun siam sak an phut. "Applicants tam tak written exam nei vek tawh, in ziaktling te pawh OTR-a document an upload kim loh avanga personal interview tura tlinglo leh reject leh tam tak an awm a, heng mi - written exam a tling tawh, personal interview la hmachhawn lo te hi an interview hma ngeia offline-a document submit tira, chance pe leh ngei turin kan ngen a ni" an ti.

MZP chuan nizan dar 11 hnu lamah MPSC-in mipuia thiamchanna atan interview tur awm hrang hrang te an rawn vawrhdarh nia sawiin, "hetianga aspirants te harsatna sutkian tum aia mipui rilru hruaikawi tumna hi a zia lova, mipui rilru hruaikawi tumna thuchhuah hi thleng nawn tawh lo se kan duh" an ti bawk.#zabilianznews

MPSC full Commission a nih theihna tura member ruat belh tura sorkar an ngen hnu ah member ruat belh an nih avanga an lawmthu MZP chuan an sawi a. MPSC indaihlohna phuhruk tura sorkarin thawktu mi 25 lak belh a tum te leh Chief Minister-in MPSC thuamchak zel a nih tur a sawi te pawh lawmawm an tih thu an sawi.

Sorkar hmalaknaah lawmna tur tam tak a awm ruain, MPSC avanga harsatna tawk zirlai leh thalai engemawzat an awm thu leh thuneitute pawh vawi tam tak sawipui an nih tawh thu MZP chuan an sawi a. An beisei anga hmakakna a awm loh avang leh hnazawng mek ten harsatna an tawh chhunzawm zel avanga MPSC chhanchhuah hnatlang ko ta an nih thu an sawi bawk.#zabilianz #zabilianznews #zofatehuapzo