PHE tui sema hmasawnna tur zirho - Aizawl-ah PHE tui semtu mi 433 leh tui pump tu mi 79 an awm mek

 #ZabilianZ July 05: PHE Deptt-a Project Management Unit (PMU)-in vawiin khan Vanapa Hall-ah PHED-in Aizawl khawpui chhunga tui a sem viltu leh enkawltute pualin tuisem dana hmasawnna tur zirhona hun a buatsaih a. PHE Minister, Deputy Chief Minister ni bawk Tawnluia'n a telpui. 

PHE changtu Dy. Chief Minister chuan PHED-a thawk te chu mipui nena inhnimhnai tak an nih avangin hawiher leh tawngkam thlenga an fimkhur a tul thu a sawi a. Urban water supply scheme hnuaiah Mizorama notified town 28 te hnianghnar taka tui pek nia sawiin, mamawhna a pun zel avangin a tihchangtlunna tur scheme dang ngaihtuah thin a nih thu a sawi.

Khawpui lian te tui pek kawngah tui lakna hnar a that tawk tawh loh avangin harsatna an tawk thin niin Tawnluia chuan a sawi a. Tuihna humhalh kawngah mipuiin tan an lak nasat a tul thu a sawi. 

Thingtlang khua zawng zawngin tui thianghlim leh hrisel an neih theihna tura sorkar laipui ruahmanna, Jal Jeevan Mission (JJM)-ah tui connection 133060 chuang pek tura ruahmanah 118500 pek tawh a nih thu sawiin, pek hmabak 14460 vel pawh kumin chhunga pek hman vek tum a nih thu Dy. Chief Minister chuan a sawi bawk. 

CE, Zone-I Er. Lalrothanga'n a sawi danin, Mizorama thingtlang khua za-a 89 ah tui connection pek an ni tawh a, zirna in (school) za-a 80 leh Anganwadi za-a 97 ah tui connection pe tawh. Aizawl khawpuiah PHED hnuaia tui semtu mi 433 leh tui pump tu mi 79 an awm thu a sawi bawk a ni. 

Tui sem kawnga hmasawnna tur zirhona hi hun li ah then niin, SE, Aizawl WATSAN Circle Er. Lalrinzuala Ralte-in tui sem chungchang ah zirtirna a pe a. EE, Aizawl Water Distribution Division North Er. Lalhruaia'n tui connection pek, pipe fit leh repair chungchang zirtirin, Sr. EE, Monitoring Cell, E-in-C Er. Lalsanga'n tui meter reading lak leh tui bill chungchang a zirtir bakah EE, Aizawl Water Distribution Division South Er. Lalzuimawii'n tui tihthianghlim, thawktute leh mipuite inlaichinna chungchang-ah zirtirna a pe a. Zawhna leh chhanna leh sawihona hun an hmang bawk.