ZPM a sorkar chuan CMO pawh MINECO-ah sawnluh a ni ang. :Dr Vanlalthlana

#ZabilianZ Aug 11: Aizawl North II bialtu MLA Dr Vanlalthlana'n ZPM an sorkar a nih chuan mipui tana a awlsam zawk nan sorkar offce te hmunkhata dahkhawm (cluster approach management system) an kalpui tur thu sawiin, "MINECO kan nei sa a, hetah hian Chief Minister Office pawh sawnluh a ni ang" a ti. 

ZPM party political training vawiina neihah he thu hi Dr Vanlalthlana chuan a sawi a. Sorkar pisa te hmunkhata dahkhawm turin district hrang hrang bakah block level thlengin ruahmanna an siam niin a sawi. 

Department inhnaih zual te pawh zirchiana, a theih anga pawhkhawm dan zawn a tul nia sawiin, Dr Vanlalthlana chuan "Mizoramah sorkar department 50 dawn kan nei mek a, an thawhhona tha a awm theih nan leh awmze nei zawka hmalakna turin convergence policy hman a ni ang,” a ti a. Tuna sorkar inrelbawl dan chu a sakhat tawk lo nia sawiin, hmasawnna a taka kalpui turin sorkar department inhnaih zualte Minister pakhat hnuaiah dah a ni dawn niin a sawi bawk.

Dr Vanlalthlan chuan ram hmasawnna innghahna bulpui ber chu sorkar inrelbawlna tha a nih thu sawiin, ZPM chuan kalphung thar, mipui sorkar hnuaiah sorkar chak leh huapzo siam an tum niin a sawi a. "Tuna kan kal mek dan aia mumal leh awmze nei zawka kan kal a ngai a, chutiang tur chuan ruahmanna fel tak kan nei tawh,” a ti.

ZPM party chu corruption do turin an inpeih tawh nia sawiin, Dr Vanlalthlana chuan "a ngaihna pawh hre turah kan inngai" a ti bawk.