Nurse 40 la leh dawn, Senior Nursing Officer 10 la thuai dawn

#ZabilianZ May 28, 2026: Health Minister Lalrinpuii'n Health & Family Welfare hnuaiah contract-in Nurse 40 lak an ni leh dawn nia sawiin, Senior Nursing Officer 10 lak thuai a ni dawn tih a sawi bawk.

Mizoram Govt. Nursing Service Association (MGNSA) Conference - Aizawl Civil Hospital Conference Hall-a a hmanpuinaah he thu hi vawiin khan Health Minister chuan a sawi a. Nursing School lamah Tutor post 9 leh Warden post 1 atan MPSC written exam result nghah mek a nih thu leh Nursing College lam atan Assistant Professor post 5 advertisement nghah mek a nih thu a sawi.#zabilianznews

Health Minister chuan Mizoram sorkarin Nurse te pawimawhzia hriain an indaihlohnate phuhru turin kum 2025 April thlaa Mizoram Universal Health Care Scheme tlangzarh a nih dawn pawhin Nurse 300 chuang lak an nih thu leh a nghetin Nursing Officer 10 lak an nih thu a sawi bawk.

Civil Hospital Aizawl tichangtlung tura sorkar hmalakna hrang hrang pawh Health Minister chuan sawiin, Cath lab dah thar a nih thu leh MRI khawl leh bungraw hrang hrang dah a nih thu te, mipui chhiah tlingkhawm – CESS atanga Artroscope khawl thar Rs. nuai 120 man lei a nih thu te, kal thlak (kidney transplant) tih tan thuai tum a nih thu leh inzaina bungrua lei chhoh mek a nih te a sawi a. Civil Hospital tan electric VIP line zamna tur pawisa leh Oxygen Pump khawl thar man tur sorkarin a pek tawh thu a sawi.#zabilianznews

ZMCH-ah Cardio-thorasic surgery ti tura inbuatsaih a nih thu leh thawktute PGI Chandigarh-a an training thu te, CT Scan thar hawn a nih thu leh Siaha leh Champhai-ah CT Scan dah thar a nih thu te, Oxygen Plant thar neihna tur sum sorkarin a pek tawh thu te; Mamit District Hospital building thar peihfel a nih tawh tuh te, Serchhip, Kolasib leh Hnahthial District Hospital sak mek a nih tuh te pawh Health Minister chuan a sawi bawk.

MGNSA hian National Florence Nightingale Award dawng mi pahnih - Pi V.Lalhmangaihi, Nursing Officer leh Pi H. Mankimi, Senior Nursing Officer te chawimawina hlanin, Pu Lalhmingmawia Thangluah, Nursing Officer hnenah hruaitu chawimawina an hlan bawk a ni.#zabilianz #zabilianznews #zofatehuapzo