A luahtu tur ni lovin DIET quarters a luah tih kan finfiah : Congress thalai

#ZabilianZ July 30: Congress thalai-in vawiin khan District Institute of Education & Training (DIET) Principal leh thawktute chênna (Quarters) sak  thar tlawhin, DIET Quarters thar luahtu zingah DIET quarters-a chêng tur ni lo, Chief Minister Lalduhoma Campaigner a awm niin an sawi.

MPYCC chuan DIET quarters sak thar chu DIET hotute kuta hlan a nih tawh thu sawiin, staff-te chenna tura ruahman a ni a, staff quarters indaihlohna a nasa hle niin an sawi a. Thu an zâwtfiahna ațanga a lan danin, he quarters-a awm hming tumtu chu Lalthansanga, ZPM party-a nihna sâng tak PAC Member ni tawh leh tuna Adviser ni mek a nih thu Congress thalai chuan an sawi a. An chhungkaw member zingah sorkar hnathawk emaw, DIET a thawk emaw sawi tur an awm lo tih an finfiah nia sawiin, Chief Minister Lalduhoma sawipui leh awm tir a nih thu an dawng niin an sawi.

Congress thalai President Laltawnliana chuan "a luah tûr ni lovin he quarters an luah hi a pawi hle a, a rang thei ang bera inthiar chhuak turin MPYCC chuan kan ngen" a ti a. "Party mi uchuak taka induhsak hian kalphungthar sorkar that loh zia a lantir chiang hle ah kan ngai a, MPYCC chuan an chhuah leh chhuah loh hi kan enzui zel dawn a ni", a ti bawk.

MPYCC President chuan ZPM-in an sorkar hmaa an insawi ang ni lo, "Lal ngai lo lal a nâ, an lal a kha" tih anga ro an rel leh thin hi a pawi hle" tiin, "Rinawm hmel takin mipuiah an inzuar a, an hun a thleng ta maw tihah dâwt ringawt hmanga an kal hi an demawm takzet" a ti a. Kalphung thar chêt dan avangin Mizoram mipui te tan ZPM party chu thlawp reng tlak an nih loh thu sawiin, an chết duh dan tam tak lo thlir ve zel turin mipuite a chah bawk a ni.#zabilianz #zofatehuapzo