#ZabilianZ Feb 05, 2026: LADC Chief Executive Member (CEM) C. Lalsawmzuala hova LADC Transport department hotute, Young Lai Association (YLA) town branch leh Village Council aiawh te thukhawmin, zankhuaa kawngpui kama lirthei dah thin te atanga parking fee la turin thutlukna an siam.
Lawngtlai khawpui chhung kawngpui tawt lutuk tihziawmna tur leh lirthei nei, garage nei si lo te laka hmalak dan tur ngaihtuaha CEM hova thukhawm chuan, dan tlawhchhana ruahmanna siamin, kumin March thla atangin LADC road & transport department-in Lawngtlai khawpui chhung kawngpui kama zankhuaa lirthei dah thin te hnen atangin fee an la tawh dawn a ni.
He ruahmanna thar kalpui tur hian Lawngtlai-a branch YLA leh VC tin ten Village Level Parking Management Committee an din anga, hmalakna enzui kawngah pawh mawhphurhna thui tak pek an ni ang.
Lawngtlai khawpui chhung kawngpui kama zankhuaa lirthei dah thin te chu - HMV/Pick-up leh a chunglamin zan khatah Rs. 500, a thla bi-in Rs. 2,500; LMV leh three wheeler Rs. 250, a thla bi-in Rs. 1,500; two wheeler Rs. 150, a thla bi-in Rs. 1,000 te chawi tura ruahman a ni.#zabilianz #zabilianznews #zofatehuapzo
0 Comments