Budget Session hun hman dan tur duang turin January ni 28,-ah Business Advisory Committee thukhawm dawn

#ZabilianZ Jan 15, 2026: Mizoram State Legislative Assembly pakuana ṭhutkhawm vawi 6-na in a awh hun chhung tur leh an hun hman dan tur te duang turin January ni 28, 2026-ah Business Advisory Committee an thukhawm dawn.

Tarlan tawh angin Mizoram State Legislative Assembly pakuana ṭhutkhawm vawi 6-na, Budget Session ni tur chu February ni 17, 2026 chawhma dar 10:30-a ṭan tura kohna January ni 12, 2026 khan Larsap General VK. Singh-a'n a tichhuak a ni.

Legislative Assembly thutkhawm hi Larsap-in House Leader berawn chungin a ko thin a. Larsap-in session a koh hnuah Speaker kaihhruai Business Advisory Committee-in session neih hun chhung tur leh hun hman dan tur te an duang thin. Business Advisory Committee hi rorellai leh eptu lam aiawhte pawh an telna committee a ni.#zabilianznews

Larsap-in session a koh atangin Member of Legislative Assembly (MLA) ten he session atan hian zawhna an zawt thei nghal a. Tuntum session atan hian vawiin thlengin zawhna lut a la awm lo.

Zawhna te chu form siamsa hmanga ziaka zawh thin ni mahse, kum 2024 budget session atang khan National e-Vidhan Application (Neva Application) hmangin MLA ten online-in zawhna an zawt thin ta a. Thutkhawm tan hma, ni 15 a la awm thlengin MLA ten zawhna hi an zawt thei a ni.#zabilianznews

Zawhna lut te chu Assembly Secretariat lamin a zawhna azira a chhangtu tur Deptt. lama thawn turin an lo buatsaih a, dan anga Speaker-in a pawm veleh Deptt. lamin an chhan tura thawn chhuah thin a ni. Thawnchhuah a nih atanga ni 10 chhungin Deptt lamin a chhanna chu Assembly Secretariat-ah an thehlut leh hman tur a ni a. Chhan mai harsa deuh, information dap khawm deuh ngai a awm a nih chuan 'interim reply' an tih chu an thawn thin bawk.

Zawhnate hi chi hnih - starred question leh unstarred question a awm a, starred question chu session-a zawhna leh chhanna huna a changtu Minister-in an chhan nghal thin hi a ni a, unstarred question erawh chu chhan thui ngai deuh leh document tul te thil tel ngai chi niin, a chhanna pawh member te dawhkanah an dah mai thin a ni.#zabilianz #zabilianznews #zofatehuapzo