Editorial : Traffic Jam tiziaawm turin khawpui zauh leh sumdawnna khawpui kan mamawh em?

#ZabilianZ July 24: Aizawl khawpuiah traffic jam a nasa tulh tulh a, sorkar apiangin Aizawl traffic jam tihziaawmna tur hria an inti a, sorkar tawh reng rengin Aizawl traffic jam tihziaawmna tur nia sawia an hmalaknate erawh "Reilote chhung atana nachhawkna ang chauh vek a la ni" ti ila kan uar lutuk awm love.

Lirthei intlanchhawkin traffic jam a tiziaawmlo tih a chiang tawh a, a tiziaawmlo mai ni lovin traffic jam a ti zual sauh zawk nia ngaih theih a ni hial. Khawpui chhung kawng kual leh pengthuamte siksawi a ni a, lirthei park na hmun tur te buasaih belh a ni a, PAHOSS te kan hre chho zel, heng te hian awmzia a nei a nih pawhin reilote atana 'nachhawkna' ang chauh a ni ang.

"Kan sorkar neih tawh te hian an term chhunga buaipui daih tawk vel chauh zel an buaipui" te pawh ti ila a dik thui viau awm e.#zabilianz

Enge kan mamawh ni ta ang? A chhanna tam tak awm thei zinga pakhat chu 'Khawpui kan mamawh belh - khawpui zauh hawk a tul- tih hi a ni awm e.

Kan ram hruaitute hian an ngaihtuah thleng pha ngei ang, heti hawi zawnga awmze neia hma la erawh an la awm lo. India ram ril zawk chu sawiloh kan thenawm state te pawhin khawpui tia chhal tling pahnih/pathum te an nei a, sumdawnna khawpui te hial an neih laiin keini chu Aizawl-ah kan la inbengkhawm vek.#zabilianz

Chhim leh hmar, chhak leh thlangah ruahmanna mumal tak nen Aizawl hi zauh hawk a tul a, nakin lawka Rel lo thlenna tur Sairang. Sihhmui phai ruam zawng zawng, Lengpui thlengin sumdawnna khawpui (commercial city)-a chantir a tul. Khulai khu hmun dang aia a remchan bikna - Lengpuiah thlawhna tumhmun a awm sa a, Rel-in Sairang a rawn thleng dawn bawk, hei hi sumdawngte tan a remchang hle ang.

Sumdawnna khawpui chu din thut theih a ni lova, din theih erawh a ni. Kan la tlai lovin a lang a, sorkarin ruahmanna fel tak neiin hma la sela thil theih a ni ang. Keinin hma kan la lo a nih chuan Rel-in Sairang a rawn thleng anga, hnamdang sumdawng lian tak tak ten khulai ruam khu reilote ah sumdawnna khawpuiah an rawn chantir tho thova a rinawm avangin kan tlai tep tawh zawk a ni.#zabilianz

Sumdawnna khawpui kan neih chuan lirthei hmanga eizawng ten tlanna tur an neih belh teuh ang a, inhlawhna tur a pung ang, thil dang pawh ken tel tam tak a nei ang a. Aizawlah chuan mipui nitin mamawh leh tul zual zawrhna te chauh a awm hun a thleng ang a, kan inhnawhtawt lutuk pawh a ziaawmin a rinawm a, 'ram leh hnam humhalh' na kawng khat pawh a ni ang.

Sairang thleng Rel lo lut tur hi inkuangkuaha kan lo nghak mai a nih chuan kan tisual hlein a rinawm, kan lo inbuatsaih lawk a ngai, chu chu ram leh hnam humhalhna atan pawh a pawimawh phak a ni.#zabilianz #zofatehuapzo