Editorial : Zalenna hman dik

#ZabilianZ July 26: Tunlai khawvelah chuan tu te pawhin 'zalenna' a bikin mimal zalenna kan chawivawng tawh hle hlawm a. Hetih rual hian kan zalenna hman dan tur lam erawh kan ngaipawimawh lutuk lo niin a ngaih theih.

Mi tam tak chu mimal zalenna hman dik tawk loh avangin mualphona khurah te an tlukluh phah hial a, mi huatrawn hlawh ta hial te pawh an awm bawk. Kan mimal zalenna hi midang te tana hnawksak zawng emaw, midang taksa leh rilru hliam zawng emawa kan hmang a nih chuan 'zalenna hmang diklo' kan ni tih kan inhriat thar fo a pawimawh awm e.

Kan nitin nunah social media a mikhual ta lo hle a, mitin deuhthawin mahni inchhung lum atanga vantlang hriata kan mimal zalenna lan chhuahtir theihna kan hum ta fur mai. Tunhma aiin mimal zalenna hman dik loh palh theihna kawng a tam a, kan fimkhur zual sauh sauh a tul tihna te pawh a ni ang.#zabilianz

"A rilru a te, a tuang a chhah lo em mai" kan tih fo tawh chuan kan zalenna hmansualna kawng kan zawh tan a ni tih kan inhriaa inenlet thuai kan mamawh tihna a ni thei. Kan duh zawng leh kan rilrua awm te sawi chhuak turin zalenna kan nei, a dik, amaherawhchu, kan duh zawng leh kan rilrua awm te sawi chhuak tura zalenna kan neih rualin, miin kan taksa emaw, kan rilru emaw min hliamsak avanga dan hmanga lo inveng tur leh dan tlawhchhana zualko theihna hmuna zualko tura zalenna pawh kan nei tel ve theuh a ni tih kan hriat tel a pawimawh ang.

"Zalenna ka nei alawm" tia midang chungchang te duh dan hawi hawia kan sawi chuan kan zalenna kan hmang diklo a ni tih kan inhriat a pawimawh a. An chanchin kan sawia khan min khinglet turin zalenna a nei ve tho tih kan hriat tel reng a pawimawh khawp mai.#zabilianz #zofatehuapzo