Editorial : ZPM, Val Upa Council leh Adviser

#ZabilianZ July 23: Party dang ang lo takin sorkar lai party-in Val Upa Council (VUC) an nei a. Mizo khawtlang nuna Val upa nihna leh an tih tur te chu kan hriat sa theuh a ni. Sorkar lai party-a Val upa te hian mipui beisei ang leh kan hnama Val upa te nihphung an phawk chhuak zo lo hle ni a ngai tam tak an awm niin a lang.

ZPM party-in an lo sawi thin danin VUC chu sorkarna an chan pawha sorkara nihna. chanvo leh hamthatna dang dawng chuang lova sorkar thurawn pe a, sorkar kal sual tur vengtu tur an ni. Heti a nih avang hian mipui lamah pawh kalphung thar sorkar ah chuan sum tam tak senga adviser inruat ang chi awm lo tura ngai tam tak an awm.#zabilianz

ZPM party-in thla sarih chu sorkarna an chelh chho ta a. Adviser bakah tul lem lova ngaih consultant thlengin an inruat chho ta viau mai leh VUC in awmzia an nei tak tak lova ngaih theih tur thil awm palh thinin an laka beiseina sang tak nei mipui tam tak beisei an pha lo tan nia ngaih theih te pawh a ni.

Chief Minister la ni ngai lo Chief Minister, Home Minister la ni ngai lo, mai ni lo, MLA pawh la ni ngai lo Home Minister a ni a, Minister leh rorel lai MLA zingah pawh tuna an dinhmun ang la luah ngai lo leh an chanvo ang la chang ngai lo a tam zawk an nih avangin engemawchen chu dai pelh palh nawk nawk pawh thil awm thei a ni. Chutih rual chuan an nihna leh an chanvo pawimawh dan ngaihtuahin dai pelh lo tura fimkhura, inzir tura ngaih leh beisei erawh an ni thung.

VUC member te kan en chuan sorkar thurawn pe tura rintlak tak tak vek an ni a, sum sen belh lova sorkarin adviser tha tak tak a neih sa VUC hmang tangkai ta lova sorkar sum tam tak sen belh zawng leh ram danpui kalh anga ngaih theih hial zawnga an kal ve tho na ah hian kalphung thar a lang lova, "an insawi angin an awm lo" te pawh a tih theih ang.#zabilianz

Hriat theuh angin rorel lai party hi an party chakna hmanga sorkarna chelh an ni lova, sorkar kan neih tawh te duhkhawp lova, an laka beiseina sang tak neia hmasawnna tak tak duhtu te vote hmanga sorkarna siam thei an nih avangin an lakah mipui thikthu pawh a chhe tulh tulh dawn tih an hriat reng a pawimawh awm e.

Thla sarih sarih chhungin thil tha leh ram tana tangkai tam tak pawh tiin, hma pawh nasa takin an la tho tih erawh mipuiin an hmuh hmaih bik lova. Engkimah inzira, party worker te pawh an tawngkam thlenga an fimkhur leh zual a tul niin a lang. An laka beiseina sang tak nei mipui te ngaih an ti ngam zan lo chho zel a nih chuan term khat sorkar-a inchhuah theih a ni tih an inhriat reng a pawimawh ang.#zabilianz #zofatehuapzo