Congress party chu mipui mamawh leh mipui milin kan insiamthar leh thin :MPCC Treasurer

#ZabilianZ Oct. 21: Sinlung Hills Council inthlan atana campaign kalmekah vawiin khan MPCC Treasurer Dr. Lalmalsawma Nghaka chuan Ratu a tlawh a. Khawtlang hruaitu thenkhat te kawmin, khawtlangin harsatna an tawh hrang hrang te a sawipui.

MPCC Treasurer Congress party-in hma thar la-in an tho kang leh dawn nia sawiin, Congress party chu mipui mamawh leh mipui milin an insiamthar leh thin niin a sawi a. "Kan hmathlir te mipui mamawh milin kan her rem thin. Tluksawp chang nei thin mah ila, Pathian khawngaihna a zarah mupui sang taka a thlawk kang leh thin angin kan tho kang ve leh thin," a ti.

Dr. Lalmalsawma chuan, tunhnai inthlan awm ah te an che tha lo hle tih sawiin, an chaklohnate chu inzirna leh chona thar petu a nih thu a sawi a. Ram mipui tana chhenfakawm sawrkar a din leh theihna tura hmathlir thar nen mipui mamawh zir chiang chungin tho kang leh turin an inbuatsaih mek niin a sawi.

Sinlung Hills Council inthlan lo awm tura Congress candidate te chu an hotu ten uluk taka an ngaihtuah hnua an bial theuh mipuite tana nasa taka hnathawk thei tur leh mahni inhaivur tum lova mipui rawngbawla inpumpek tura an rin te an nih thu sawiin, "thlan tlin an nih chuan Congress hi party dang pahnih hotu ten thu an sut leh zung zung ang kan ni ve lo, kan intiamnate kan tihlawhtling thin" a ti bawk.#zabilianz #zabilianznews #zofatehuapzo